Ni cuanto e gobierno aki paga varios compania di mercadeo pa tapa e mal gobernacion di pais Aruba door di GE I y II, e berdad a sali na cla. Varios medio di comunicacion a coopera cu Mike Eman y AVP pa goberna a base di fabornan politico, clientelismo y persecucion politico. Recien nos por a wak un radio emisora liga na AVP ta haña contractnan lucrativo di fondonan publico, pa no papia mes di e 8 miyon den 8 aña cu e medionan comprometi a sa di probecha di esaki.

Banco Central cu a wordo silencia y manipula pa gobierno a dicidi raporta e estado di nos pais. Nos economia ta totalmente tranca. Confiansa di e consumidor a deteriora den e prome trimester di 2016 y aña pasa nos tawata tin un crecemento economico di 0,1%, confirmando cu nos pueblo ta pasando den momentonan sumamente dificil. Condicionnan financiero personal di nos pueblo a bira pio. Comerciantenan (50%) a bay atras drasticamente. Un grupito (4%) a mehora den e mercado laboral. Nos pueblo a perde confiansa den e estado di nos economia. Hasta den sector priva of publico condicionnan personal financiero a bay atras. Mayoria di nos pueblo no kier cumpra auto of aparato grandi, haci prestamo of construi cas. Nos pueblo no tin confiansa mas den nos economia actual ni den futuro cercano.


E discrepancia continuo di Banco Central, College Financiele Toezicht (CFT) y Gobierno di Mike Eman ta alarmante. Banco Central tin e crecemento economico na 1.1% pa 2016 y Gobierno na 6.1% mustrando un bes mas nan falta di seriedad y transparencia den gobernacion. Tanto e lider di fraccion di AVP, Sr. Rene (Baba) Herdé a manipula cu e desorden den financia publico. Si no tawata pa fraccion di MEP, PDR, PARA y Grupo 7 no lo tin un reapertura di nos refineria pa gobierno por logra e deficitnan den e ley di CAFT (Curatela). Un berguensa total e cos aki a para bira. Tanto articulo Baba ta skirbi y nos Prome Minister Eman ta papia di financia publico sostenibel, pero si no tawata pa e POSIBLE reapertura di nos refineria nan lo a haña un otro KB mirando cu CFT ta bisa bon cla cu nan no a cambia nada den nan maneho desastroso. Mi ta cita: "De verbetering van het financieringstekort van het Land Aruba van circa 2% van het BBP in 2016 naar circa 0,5% in 2017 wordt bijna volledig gerealiseerd door incidentele kapitaalontvangsten van AWG 67 miljoen als gevolg van de overname van de olieraffinaderij."
Pues aki ta keda confirma door di Banco Central cu gobernacion di Aruba ta den crisis mirando cu nan no tin ningun vision y otro desaroyo economico andando. Pakico? Pasobra ta mal gobernacion tin. Y ta di chiripa e mal gobierno di Mike Eman 2, ta logra baha su deficit ariba ordo di CFT cu a exigi di gobierno pa cobra Citgo pa hasi uzo di e operacion di e refineria mesora y pa nan paga 67 miyon florin.  Door di e mal maneho aki di AVP nos economia ta stanca. Costo di bida a bira hopi caro y tur famia ta biba preta debi cu mester gasta tur nan placa na cuminda, awa, coriente, medidanan di gobierno y hipoteca of un huur halto. Pa loke ta e situacion den cada hogar, Banco Central a constata cu e crisis den gobernacion tin efecto dramatico tambe ariba e pueblo, debi cu hopi famia a bay hopi atras den nan cartera. A registra cu mas cu 56% di e trahadornan no por cumpra un auto, casi 64% no ta bin na remarca pa haci un prestamo pa cumpra un wasmashin, muebles  etc y casi 71% no por haci un hipoteca pa construi nan cas di nan soño. Mientras tin 11 mil hende registra pa un tereno e mal gobierno aki ta duna su famia, amigo y sponsernan so tereno. Un abuso y inhusticia total. Door di e situacion aki tur luna mas cu 4000 famia tin problema pa paga nan recibo di awa y 8000 mil famia no por paga nan recibo di coriente. Nos por mira tambe cu poco poco tur e 24 medidanan proponi door di Gabinete Eman ta yegando den cartera di nos pueblo. Un situacion hopi tristo ta loke ta pasando. E mal gobierno di Mike Eman ta culpabel pa e explosion social y deterioro den nos pais.
Pueblo Arubano, no laga e gobierno aki sigui destrui e tiki cu a resta di nos pais. Ban mobilisa di bario pa bario, districto pa districto den henter nos teritorio pa baha e gobierno di mas malo den 30 aña di nos Status Aparte. Eleccion 2017, ban rescata nos dushi pida baranca. Solo el pueblo, salva el pueblo.

Expresionnan haci den e articulo aki no necesariamente ta refleha opinion di ArenaPoliti.co