Oposicion no por atende cu reto y problema di awe of di futuro. 

"Den lus di retonan grandi y problema, sea di awe of di futuro, partido MEP a mustra na hopi ocasion cu nan contesta ta pa core pa e reto, para desaroyo, destrui loke segun nan ta un problema y duna hende culpa. Awor partido PDR tambe a uni na e club di partidonan cu no por presenta solucion pa retonan cu nos pais tin. Nan contesta tambe ta "kibra cos" y duna hende culpa." Esaki ta loke e lider di fraccion di AVP a declara den weekend ora ela tende e pensamento di e lider di PDR sr. Bikker, riba e pregunta con pa mehora e situacion na negoshinan den Caya Grandi. Rene Herde': "Mi a tende destrui. NO soluciona. NO construi."

Segun e lider di fraccion di AVP, ta parse cu e unico contesta cu MEP y PDR tin ora nan haya nan mes confronta cu un problema, ta pa kibra cos. Confronta cu e habrimento di e posibel seramento di e refineria, MEP a menasa e doñonan y bisa nan coi e refineria y bay cun'e. Confronta cu e reapertura di e refineria na 2011, e actual lider di MEP a core sali for di e reunion enbez di sostene e refeneria. Den pasado MEP a kibra un cantidad di desaroyo positivo ora nan a drenta gobierno (1989 y na 2001). Enbez di cambia un situacion di problema den uno deseabel y positivo, nan a kibra loke tabata tin y persigui hende cu a traha pa Aruba. Rene Herde': "Si MEP y PDR no por soluciona niun situacion dificil, ta kico MEP y PDR lo a haci si nan a haya nan mes cu e responsabilidad grandi cu AVP a haya na 2009? Pasobra co'i kibra no tabata tin. Ta casi tur cos tabata na werki caba ora MEP a sali di gobierno. Ta con nan lo a enfrenta anto un economia cu a cay te bou di suela (-15% negativo)? Ta con nan lo a lanta economia si nan unico proposicionnan tabata pa comberti caya grandi den un caya yena cu casino y pa crea wega di casino on-line? Ta con nan lo a haci pa baha desempleo cu tabata na 12% na 2009? Ta con nan lo a haci pa habri e refineria, si prome nan tabata contra, despues nan a bisa cu nan tin hopi compania, pero niun compania a presenta ora a yama nan? Ta con MEP y PDR lo a atende cu e fondonan di pensioen cu tabata casi bancarota y lo a laga tur pensionado sin entrada? MEP tabata y ta contra e renobacion di e fondonan di pensioen cu a sigura mas cu 20 mil pensionado nan entrada sin corta aden? Ta con MEP y PDR lo a drecha Caya Grandi cu nan mes a converti den un centro di "chollernan"? Ta con MEP y PDR lo a atende cu tur e temanan cu Dialogo Social a trata y soluciona, si MEP y PDR tabata y ta contra Dialogo Social y a yama Dialogo Social "perdemento di tempo"?

SOLUCIONA Y CONSTRUI
Rene Herde' ta puntra ta unda nos pais lo ta awe, si AVP lo a haci mes os cu MEP y PDR ta haci? Esta, di kibra cos enbez di busca solucion creativo y contrui nos pais, cra trabou y sigura entrada pa nos pais y nos hendenan. Pueblo kier wak solucion y progreso, no destruccion cu ta manda nos bek den tempo. E mentalidad cu MEP y awor PDR ta demostra ta masha di lamenta. Nan no ta presenta niun solucion pa niun problema of situacion dificil, manera den Caya Grandi. Al contrario kier kibra cos y manda Aruba atras ta nan contesta!

Expresionnan haci den e articulo aki no necesariamente ta refleha opinion di ArenaPoliti.co