Mientrastanto e ta obvio pa tur hende cu gobierno a intensiva su campaña electoral, cu por cierto nunca a caba, pa laga un parti di e pueblo sigui kere cu esaki ta bon gobernacion. Cu un parti di e pueblo ainda no por mira cu cuminsa hopi proyecto miyonario cu placa fia, no ta sinonimo cu bon gobernacion, ta keda un misterio. Despues cu gobierno no a haci nada e ultimo 7 añanan pa e hende local, diripiente 1 aña prome eleccion diferente proyecto y ponemento atrobe di ‘klinkers’ mester susha wowo di e hende local. Esaki ta un version moderno di e triki electoral bieu, cu antes tabata wordo yama ‘yenamento di buraco cu asfalt prome eleccion’.  E diferencia grandi ta, cu e triki ‘yenamento di buraco cu asfalt prome eleccion’, no a haci Aruba bancarota, e tabata wordo haci pa hende local, e no a haci Aruba bira ‘mendigo’ di ningun otro nacionalidad of cu e la conduci cu awendia tur patrimonio mester wordo hipoteca of regala pa paga pa proyectonan electoral miyonario di susha wowo.

E gobierno actual a redobla Aruba su debe den apenas 3 aña, bou capa di embeyecemento y ‘Green’. En realidad esaki tabata un capa pa tapa wowo di pueblo pa no mira con e grupito privilegia tabata biaha, fiesta, bira mas miyonario y doño di tur tereno of propiedad na Aruba. Tambe e capa di ‘tapa wowo’, tabata pa sconde e bendemento di tur sorto di permiso na hende stranhero, haciendo asina e Arubano un ciudadano di tercera clase na su propio pais. Pa 7 aña largo, no tabatin tereno, un cas social of un trabou bon paga pa esunnan local. Awor gobierno kier laga pueblo lubida e 7 añanan di amargura cu algun proyecto cuestionabel manera e ‘Caminda Scur’, e waf di Barcadera, e fantasma ‘CITGO-deal’, e 3 edificionan di MFA y luznan di LED. Tristo ta cu tur e proyectonan menciona, lo bay costa Aruba atrobe biyones. Ningun di e proyectonan ta wordo financia cu fondonan propio. Tur ta wordo financia cu placa fia, na cual tin hopi ‘finder’s fee’ mara. Pues atrobe pueblo lo paga, pa laga e grupito privilegia sigui gosa.

E ta obvio cu gobierno nunca a sirbi e interes di pueblo, pues e lo no ta logico pa pensa cu diripiente gobierno lo tin un cambio di curason y cu e lo cuminsa sirbi e interes di pueblo awor. A pesar cu pueblo a wordo confronta cu e amargo berdad cu e ta bancarota, ainda gobierno mester a organisa e show bergonsoso di ‘dieta Ensure’ pa laga pueblo kere cu tur hende ta gaña, menos gobierno. A pesar cu henter e comunidad sa mientrastanto cu Aruba ta bancarota, cu a Aruba a perde su independencia financiero y cu gobierno ta sutando pueblo cu medida (pa gobierno ahustacion), ainda gobierno ta fia placa manera no tin un fin. Anto e pregunta ta, pakico tin un parlamento of un College Aruba financieel toezicht (CAft), cu mester controla gobierno su sed di malgastamento di placa?

Banco Central di Aruba ta remarca den su ultimo boletin cu e debe nacional a bolbe crece: ‘The government’s total outstanding debt expanded by Afl. 64.9 million or 1.7 percent to Afl. 3,974.1 million at end December 2015 (Statistical News Release, August 10, 2016)’.

Pues bo no mester ta un ‘Einstein’ pa sa cu e debe nacional lo sigui aumenta e siguiente añanan, manera pueblo lo mester cuminsa paga bek locual gobierno a fia pa su proyectonan electoral miyonario di susha wowo. Awor dicon un parti di e pueblo ta sigui guli cu smaak e fabula di gobierno cu tur cos ta bon, mientras cu sin e proyectonan electoral miyonario di susha wowo, e debe a crece aña pasa cu Afl. 64.9 miyon? Con gobierno ainda por trata di bende pueblo e storia di e reapertura di e refineria cu lo paga Afl. 18 miyon y kisas algun miyonnan extra na impuesto, como e ‘salbacion’ cu lo reduci e debe nacional biyonario? Pa esunnan cu kisas no por mira, Afl. 18 miyon na entrada (cu por yega kisas Afl. 30 miyon), ainda ta hopi menos cu locual e debe nacional a crece cu’ne na 2015. Corda cu e inversionnan cu e conversion di e refineria pa un ‘mehorador’, hunto cu esunnan di tur e proyectonan electoral miyonario di susha wowo, tambe lo aumenta e debe nacional. Pues e ta mas probabel pa kere cu e debe nacional biyonario lo aumenta cu mas di e Afl. 64.9 miyon e siguiente añanan enbes cu e lo wordo reduci. Pues ainda e ta keda pa nos di partido ABO hopi dificil pa compronde y un misterio, con un posibel entrada di maximal Afl. 30 miyon, lo por ta e ‘salbacion’ pa reduci Aruba su debe biyonario creciente.

Locual e politico tradicional no ta compronde y un parti di e pueblo tambe, cu nos debe nacional ta creciendo hopi mas lihe cu e medidanan di austeridad. Ni maske cuanto gobierno, parlamento y CAft kier pinta e porco ‘mehorador’ cu lipstick como e ‘salbacion’, e supuesto entradanan cu esaki lo genera, ta hopi menos cu e aumento anual y lo no yuda cu nada. Pues si ultimo tempo bo a ripara cu bo ta cana mas dobla of sinti cu bo peso a subi, e no ta pasobra bo ta birando bieu of cu bo a come di mas. E sintomanan aki ta e resultado di e peso financiero adicional, cu gobierno a bolbe pone riba bo lomba ‘sneaky y scondi’ cu su proyectonan electoral miyonario di susha wowo!


(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co