For di hopi tempo nos a senjala un trend nobo den nos turismo. For di anja 2014 nos a nota un tendencia abnormal den nos turismo caminda e cantidad di ‘’turistanan’’ for di Venezuela a aumenta explosivamente. Ningun pais den Caribe no a experencia e crecemento for di turismo di Venezuela manera tawata e caso na Aruba durante ultimo 2 anjanan. Na anja 2014 nos tur por corda con Otmar Oduber hunto cu Mike Eman a bai aeropuerto bai celebra e yegada di e di 1 miyon turista. Sabiendo e tempo ey cu e crecemento den turismo tawata un ficticio toch Otmar Oduber a opta pa duna su mes credito. Ningun momento a bisa pueblo e berdad y splica for di unda e crecemento inusual den turismo a bin. Pa nos pueblo haya un idea y un mihor bista, un splicacion riba e trend den nos turismo. Semper nos pais a goza di un gran cantdidad di turistanan for di Venezuela. Normalmente nos pais tawata ricibi entre 120.000 cu 150.000 turista for di Venezuela. Na anja 2014 y 2015 esaki a cambia drasticamente y Aruba a conoce un aumento den cantidad di bishitante for di Venezuela. Na anja 2014 y 2015 esaki a yega alrededor di 350.000 turista for di Venezuela cual tawata un crecemento di mas cu 200.000 turista. Nos a bisa e tempo ey cu e crecemento aki no ta uno normal y mas bien ta un crecemento ficticio mirando cu gran cantidad di turistanan tawata bin pa raspa tarheta y saca divisas for di nos pais.  Cada swipe di un turista Venezolano durante anja 2014 y 2015 a wordo registra na Banco Central como un benta siendo mayoria di e swipenan aki tawata placa cu tawata wordo saca for di nos economia. E tempo ey Otmar Oduber a bisa cu ta turistanan cu tawata bin pa contribui na nos economia.

Awe cu nos ta na anja 2016 tin caida den cantidad di bishitante y awor Otmar Oduber ta bisa cu esaki ta debi na e caida di bishitantenan di Venezuela y ta cualificanan como RASPA CUPOS. Na luna di juli 2016 e cantdidad di turistanan cu ta bishita Aruba a cai cu casi 10%. Esaki tawata un caida di casi 10.000 turista. No solamente e cantidad di bishitante a cai sino e grado di occupacion di hotelnan a cai, e REV PAR (revenue per available room) a baha cu 2.9% y tambe e average daily rate a baha cu 5.5%.

Remarcabel ta e hypocrecia di Otmar Oduber den manera di maneha nos turismo. Ora turismo ta subi ta gracias na su esfuerzonan y ora turismo ta cai ta culpa e Venezolanano. Un minister di turismo honesto y sincero lo a reconce e trend nobo den turismo y no a bai gaba cu un crecemento ficticio. Nos mester un minister di turismo cu ta papia e berdad aunke e berdad no ta cumbinie bisa. Ora un hende ta ganja, e por ganja hopi tempo pero no pa semper pasobra berdad semper ta alcanza e mentira. Den e caso di turismo nos ta constata awe cu e mascarada di Otmar Oduber ta cayendo y no por manipula mas mirando cu e cifranan no ta na su fabor mas. Esaki nan ta facts y facts DON’T LIE, people do.

Nos tin confianza den nos hendenan y nos tin confianza cu un cambio di gobernacion lo trece lo mihor pa nos pueblo den turismo. Nos mester pone enfazis den explora mercadonan nobo, focus riba calidad y no cantidad y ofrece e mihor di nos tur na nos turistanan. Otmar Oduber su vision tawata cantidad y no calidad y awe e mesun cantidad ta afectando nos turismo negativamente.

Expresionnan haci den e articulo aki no necesariamente ta refleha opinion di ArenaPoliti.co