Benny Nisbet (PPA): “Si gobierno a ejecuta e norma di UNESCO den ensenansa y ejecuta un control ' extra' annual den ensenansa ……Lo no tabatin problema na E.P.I. awe !!“
![Nisbet01](/images/2016-press/Nisbet01.jpg)
E accion di e manager na e scol EPI ta halando hopi atencion. Un problematica sumamente serio y interesante cu ta demonstra con diferente gobierno/ministro di Ensenansa no a duna prioridad na un problema hopi serio !!
PROCEDURA DI ANALISA Y CONTROL ANNUAL !!
Pa hopi anja PPA ta e unico partido politico cu a pidi pa regla un procedura annual legalmente unda tur anja un rapport di e anja escolar ta worde traja pa Inspectie di Ensenansa basa riba cual lo mester sigui cu un intercambio entre ministro di Ensenansa y veld di Ensenansa sigui pa Ministro di Ensenansa y Departamento di Ensenansa y finalmente ministro di Ensenansa y Parlamento di Aruba. Conclussionan di tur problema existente lo worde accorda den decisionan con pa atende cu nan y solucciona nan den curso di e maneho di ensenansa anualmente. Esaki lo mester bini acerca na e tratamento di presupuesto durante cual tambe asuntonan di ensenansa ta worde trata. Lamentablemente diferente gobierno di Aruba di e diferente signatura no a sinti e necesidad pa tuma over e proposicion di PPA.
Si acaso Aruba a conoce un proceso extra asina anto anualmente e problema aki lo a bin riba mesa di asuntonan cu tabata exigi atencion masha tempo kaba. Pero ja cu ni gobernacion geel ni gobernacion berde no a duna prioridad na e problematica di e ‘managernan’ na EPI awe mundo di ensenansa ta sinta cu e problema aki den nan scochi for di cual nos studiantenan lo por sali perjudica.
NORMA DI UNESCO…INVERSION DEN ENSENANSA MINIMAL 6 % DI NOS ENTRADA NACIONAL !!
Na mes momento ta un hecho tambe cu anjas largo PPA ta e ‘unico’ partido politico cu ta boga pa accepta un maneho conforme norma di UNESCO cual ta ensera cu e inversion di gobierno den ensenansa lo mester ta 6 % minimal. Na Aruba desde 1986 e diferente gobiernonan no a cumpli cu e norma di UNESCO !! E averahe di inversion den ensenansa di tanto ‘geel’ como ‘berde’ durante e 30 anja di nos Status Aparte tabata core den 4.5/4.6 % di nos GDP. Locual si ambos a hasi ta hunga cu cifra como cu nos GDP/ENTRADA NACIONAL a crece substancialmente durante curso di anja nan a aumenta e inversion pero nunca no a jega na e norma di 6%. Te cu algun anja pasa e averahe cu nos ensenansa no tabata ricibi tabata core den 70 million florin anualmente. Hopi problema por a worde soluciona si acaso hiba un maneho conforme e norma di UNESCO probablemente e problematica di ‘managernan na EPI’ lo por a worde solucciona mientras tanto.
PPA ta lamenta e situacion actual y ta pidi pa nos flamante ministro di Ensenansa sra Hooyboer realisa cu ta gobierno ta esun responsabel pa e situacion actual na EPI !! Ta gobierno tin di busca un soluccion en vez di sconde tras di ‘leynan’ existente cu ambos gobierno incluso gobierno di AVP/ x ministro Dowers encarga cu Ensenansa y ministro Hooyboer por a solucciona y no a solucciona. Palabra ta na ministro Hooyboer…demonstra cu bo por carga e responsabilidad ministerial debidamente. Na mes momento PPA kier cuestiona unda nos parlamento ta keda dentro di un situacion serio asina unda nos studiantenan lo worde perjudica ???
Aruba, 15 di augustus 2016 Lider Politico di PPA
BENNY NISBET
Expresionnan haci den e articulo aki no necesariamente ta refleha opinion di ArenaPoliti.co