ORANJESTAD (AAN) Diaranson Minister di Cultura Otmar Oduber cu asistencia di e tataranietanan di un di e metslanan Arubano mas conoci pa su trabao di construccion y decoracion di e casnan floria di antaño, a instala e seyo di monumento riba di e porta di Monumentenbureau. Dilanti di e edificio conoci tambe como e cas di famia Henriquez, Minister Oduber a ricibi e seyo di monumento for di Gilianne y Gilvanya Christiaans, y a instala esaki riba e porta principal di e edificio.E dos hobennan ta nietanan di Marco Christiaans, kende a yega di ocupa e funcion di presidente di parlamento di Aruba den pasado. E seyo su diseño ta inspira pa e dibuho cu ta riba diferente cas floria, esta e strea, cu ta simbolo pa “proteccion”. Minister Oduber a remarca cu e tabata un momento unico, pa por conta cu presencia di e di cinco generacion di famia di Janchi Christiaans pa asistie, y pa por subraya di e forma aki, cu e seyo special e maneho pa preserva, conserva, restaura edificionan y educa e futuro generacion riba e importancia di e edificionan monumental. E mandatario a agrega cu ta papia di edificionan bunita, cu structura unico, pero mas ainda nan mester keda preserva pa nan nificacion cultural historico, e cultura cu ta biba y cu ta recorda nos di unda nos raisnan ta. Sea e persona ta naci na Aruba of a bin biba aki y forma su famia riba e isla, e monument ta un simbolo di e pasado, e cultura y historia, e raisnan di nos hendenan.Minister Oduber a bisa cu e ta contento di por conta cu e colaboracion di Hulanda pa cu fondonan, cual ta haci posibel tambe pa tin mas trabao di mantencion y restauracion tumando luga. El a elogia tambe e bon cooperacion entre Monumentenbureau, Monumentenfonds, Monumentenraad y gobierno, cu ta haciendo tur e trabaonan necesario posibel, incluyendo un bon planning pa mantencion di edificionan ya restaura, y e restauracion di mas edificio.El a menciona tambe e mantencion di entre otro e edificio di Algemene Rekenkamer (ARA) cu tabata antes un scol y un biblioteca, e restauracion di e faro na California y e restauracion di Nicolas Store, como tambe a bisa cu e proximo edificio na San Nicolas pa ricibi su restauracion ta bira Uncle Louis Store.Monumentonan ta un parti integral di e historia y loke e comunidad ta para p’e. Minister Odubers a splica cu algun aña pasa a haci un estudio di turismo cu a mustra cu Aruba a concentra riba e desaroyo di turismo y a bira un destinacion masha moderno, pero na cierto momento a lubida riba e identidad propio y a enfoca riba e economia pa trece e abundancia necesario pa e comunidad biba di dje.E estudio ta mustra cu mester a cuminsa enfoca riba e balornan di e Arubano, y riba e capital humano di e isla, y cu esaki ta bin mas enfasis riba historia, cultura y monumentonan, entre otro.Aruba ta tumando un rol di liderazgo cu e Happiness 360 conference tumando luga aki september proximo, y e preservacion di monumentonan ta pas den e esfuersonan pa cu un conferencia asina cu ta enfoca riba felicidad di e comunidad di e pais cu ta turisticamente popular y activo, unda cu na mes momento ta enfoca riba e felicidad di e comunidad, ta accentua e identidad propio, e principionan y balornan. Cultura, y preservacion di monumentonan, segun Minister Oduber ta splica, ta forma un base integral den esaki. Desde fin di aña edificionan priva cu un balor historico, pa medio di un ley cu a wordo pasa caba, lo por ricibi asistencia di Monumentenfonds pa restauracion of mantencion di e edificio en cuestion. Loke ta central den e ley aki ta e oportunidad pa trek af parti di e trabao di mantencion for di belasting, pero tambe e mandatario a menciona e oportunidad pa haya lening na un interes mas abao y subsidio for di e restauratiefonds di Aruba. Esaki ta habri porta pa miho cuido di edificionan cu no ta poni riba e lista di monumento, pero cu tin nan balor, pa facilita y incentiva e doño(nan) pa restaura y mantene nan edificionan priva di balor historico tambe.

Expresionnan haci den e articulo aki no necesariamente ta refleha opinion di ArenaPoliti.co