ORANJESTAD – E siman aki otro bario a ricibi e luz publico cu tanto nan tabata spera riba dje. Despues di Seroe Pela algun dia atras, awo a toca turno na Palm Beach. Gobierno di Aruba pa medio di e proyecto ‘Luz den Bario’ ta brinda no solamente claridad, pero tambe siguridad. Prome Minister Mike Eman personalmente ta bay na e sitio di e prome instalacion pa comparti esaki cu e bisiñanan y tambe pa participa den e proceso di instalacion. Esaki ta un momento cu e ta gusta comparti cu e habitantenan pasobra por sinti e alivio cu ta cuminsa reina den e bisindario y e gradicimento cu finalmente a duna oido na nan peticion.

E proyecto di ‘Luz den Bario’ ta posibel danki na e trabou profesional di compania nacional di electricidad ELMAR N.V. como tambe departamento publico Dienst Technische Inspectie (DTI). Representante di ambos entidad tabata presente diahuebs atardi dilanti di Palm Beach 2D y a duna di conoce di ta masha satisfecho cu e resultadonan te cu aworaki. Despues cu e trabou di instalacion na e bario en cuestion caba, e siguiente punto riba e lista lo ta pariba di brug.

Famianan Tromp, Kelly y Wu a percura pa un ambiente di celebracion. Hopi tin decadanan bibando den e bario y semper tabata anhela di por tin mas claridad y siguridad den cercania di nan cas. Tur a bini cerca di e prome palo di luz caminda a instala e prome luz di tecnologia LED den e bario. Aki tabatin caranan sonriente, combersacionnan ameno y brasanan di gratitud. Pa yama danki y celebra e momento special aki Teofila ‘Doña’ Kelly-Maduro, kende ta un di e habitantenan di mas conoci y stima, a prepara un weya di sopi di carni cu a laga un y tur na e sitio ta chupa dede.

“Bo ta ripara cu e luga aki ta bayendo dilanti,” asina Sr. Roy Tromp, otro habitante di e bisindario a comenta aplaudiendo e trabou cu Gabinete Mike Eman a bin ta haci den e aspecto aki. Desde cu a asumi mando, e bario di Palm Beach caminda e ta biba pa ya 25 aña, a ricibi no solamente asfalt cu tabatin mester, pero tambe awo su bon iluminacion publico. E ciudadano ta contento cu e departamentonan a sa di haci nan huiswerk pa bin cu e miho tecnologia, dunando balor na e inversion haci.

Expresionnan haci den e articulo aki no necesariamente ta refleha opinion di ArenaPoliti.co