Ora un pueblo wak bek riba un periodo di gobernacion ……e pueblo ta spera cu nan como sociedad a bai dilanti riba un variacion di tereno. AVP como partido politico a priminti e pueblo di Aruba y sigur e pueblo di San Nicolas ‘Un direccion nobo’ !!

Mientras tanto nos ta jegando e luna di September 2016, luna den cual e eleccion a tuma lugar na 2013 cual ta nifica cu gabinete Mike Eman(AVP) ta bai cumpli siete anja ta goberna pais Aruba y cu lo drenta e ultimo anja di gobernacion prome cu pueblo hanja otro oportunidad di vota atrobe cual lo ta na September 2017 a menos cu pueblo worde sorprendi cu un caida ainda prome cu tempo….cual no ta imposibel si analisa e situacion politico actual. 

Den seno di AVP tin un halta di problema hopi serio y francamente e Lider di partido AVP ta guli manda bow e problemanan sin soluciona  pa kada dia,siman y luna cu pasa e ta mas serca di eleccion.

Pero e realidad ta cu varios problema ta keda sin worde solucion mientras cu e barco ‘green/green’ ta keda  na horizonte jen di problema y sin cu realmente ta duna contenido real ta e ‘direccion nobo’ cu a worde priminti na pueblo di Aruba.

Sieta anja a pasa y gabinete Mike Eman no por a duna contenido na e vision ‘Aruba HUB den Caribe’ cual vision AVP a presta di PPA cu tin esaki como nos vision economico pa e ultimo 25 anja !! Durante e siete anja aki tur locual AVP a hasi ta organisa al conferencia pero sin duna contenido real na e elementonan cual lo conduci pa hasi Aruba un Hub den Caribe !!

PPA ta keda accentua cu pa cuminsa  gobernacion di AVP no a duna contenido pa mejora e producto turistico di pais Aruba. PPA a juda accentuando anjas largo e alternativanan cu lo por contribui na esaki e.o. MCI(convention tourism), Golfersdestination, Health & Wellness tourism, San Nicolas, Our Caribbean Town, destination of Shopping y e niche di un destination pa yacht tourism. Pero nada nada e gobierno actual di AVP no a duna contenido na djele.

PPA a accentua alternativanan cu lo por a contribui pa hasi Aruba un HUB den Caribe pa asina duna contenido na esaki…..e.o. Aeropuerto como HUB pa carga y pasajero, Haf di Aruba como HUB pa container cu accento riba parti di e haf na San Nicolas, Aruba como HUB riba tereno di Telecomunicacion, Aruba como HUB pa cruise tourism, un Aruba World Trade Center, un compania di Television pa henter Caribe for di Aruba …..Universidadnan cu ta ofrece e facultadnan di Idioma y IT(E-commerce)  y mas pero nada nada e gobierno di AVP no a duna contenido na djele demonstrando cu nan no a comprende nunca e vision real con pa hasi  Aruba un HUB den Caribe !!

PPA por bisa cu nos ta e unico partido cu a projecta e vision di un HUB den Caribe y cu tin contenido real pa dunele…nos ta consciente cu kizas no tur alternativa lo por logra pero luchando pa kada uno Aruba lo por jega hopi cerca di ta un ‘player’ importante riba varios tereno den Caribe cual Aruba actualmente no ta  cu excepcion di  Turismo cual tambe tabata y ta un vision di partido PPA.

Kiko AVP a ofrece y a logra pa e pueblo di Aruba riba tereno economico…esta un of mas projecto cu ta duna contenido na un vision presenta pa partido AVP na pueblo di Aruba ??? Nada per Nada mes…!! Un pueblo no por biba di ‘klinker’ y poco mas caretera !!

Drentando e di ocho anja di gobernacion Mike Eman (AVP) realidad di bida ta cu AVP a logra hinca Aruba den un debe Nacional di otro mucho  (83 % di nos GDP)……a logra un hedging cu tin pueblo di Aruba ta paga un suma halto pa crudo cual ta affecta prijs di awa, corriente y gasoline etc…formalmente aki na Aruba mientras otro pais y isla ta pasando mas cu un anja kaba pagando prijsnan abao dunando nan pueblo oportunidad pa hala rosea pero pueblo di Aruba no a hanja e oportunidad aki  pa motibo di mal maneho etc…..!!

Drentando un anja di eleccion (2017 ? of prome) ta importando pa nos pueblo ta consciente kiko e derecho di voto kiermen ?  E derecho di por pensa pa bo mes ….e derecho di por huzga entre bon y malo, berdad y mentira….E derecho di vota pa un partido basa riba su programa, su lista di candidato y no basa solamente riba tradiccion……! E derecho democratico di vota no ta nifica  vota na e sistema di un wega di ping pong of un cadena cu simpelmente no ta cambia.  SI awe nos pueblo ta consciente cu Aruba tin un gobierno malo……esey kiermen cu mester bin cambio den e gobernacion ey !! Si awe nos pueblo ta consciente cu nos tin un parlamento ‘zwak’ cu no ta controla gobierno manera debe ser  esey kiermen cu e momento ta jegando pa trece cambio den representacion di parlamento. Mas partido representa den parlamento lo garantisa un coalicion cu ta goberna cual coalicion ta contribui na mas control riba otro y cual ta sirbi interes general di pais Aruba.

Un pueblo cu no ta dispuesto pa para pa cambio ora e momento democratico jega no mester jora malay ora e slanan di mal gobernacion ta hasi bida di un pueblo mas y mas dificil. Entodo caso PPA ta spera cu articulo aki lo ta un contribuiccion cu lo sirbi como ‘food for thought’ den mente di nos sociedad Arubano.


Aruba, 18 di augustus 2016                                          Lider Politico di PPA

                                                                                         BENNY NISBET

Expresionnan haci den e articulo aki no necesariamente ta refleha opinion di ArenaPoliti.co