Na nos Pais ta reina un caos na e momentonan aki na unda cu nos ta bou di supervicion financiero, na unda cu criminalidad ta afectando cuidadano y turista, na unda cu problemanan social ta birando mas grandi, na unda tin fayonan den salubridad publico y na unda cu enseñansa ta bayendo atras. Pa no papia mes di e caos cu tin den e organo di mas halto di control, Parlamento di Aruba, den cual full e Fraccion di AVP a presta su mes pa keda sin atende reunion publico y den cual Ministernan a trapa riba Constitucion pa no bin duna cuenta na Pueblo. Tur e caos aki tin nomber y fam, Mike Eman. Minister Eman ta e autor di e caos cu ta reina na nos Pais. 

Eman no ta lidera 
Ora un Pais no ta wordo lidera pa su Minister President, ta caos ta e resultado. Pa hopi tempo caba Aruba no tin un Minister President. Minister Eman ta e Minister President nombra pa ley, pero den practica Eman no ta lidera nos Pais. E mandatario aki pa mayor parti a biaha rond mundo como loopjongen di Hulanda y ora e yega Aruba e ta bay pasa verf den bario of subi palo di luz pa mustra cu e ta haciendo algo, menos goberna e Pais aki. Hasta CFT a yega di pone den su rapport pa Eman tuma rienda di e Pais aki pa saca Aruba for di e caos financiero cu e propio Eman a hinca nos aden, pero sin resultado. Ta pio so Eman a bira. Sigur despues di e locura di welga di hamber ta mas ausente Minister Eman a bira.

Gabinete sin union
E caos aki dia pa dia ta bira mas grandi debi cu e falta di liderasgo di Minister Eman a infecta henter su Gabinete, cu ta pleita sin fin, sin cu nan ta haya tempo pa goberna na bienestar di e Pueblo aki. Un ehempel clave di esaki ta Minister Otmar cu su retiro na Gobernador y tambe su guera mediatico riba All Inclusive. Minister Eman a mustra di no por controla Minister Otmar, algo cu ta causa mas caos den gobernacion. Un Gabinete sin union nunca lo por goberna na beneficio di e Pueblo y esaki ta hustamente locual ta pasando debi na e falta di liderasco di Minister Eman.

Parlamento pa su cuenta
Pa locual ta trata Parlamento, eyden tambe e falta di liderato di Eman ta causando caos. Minister Eman no a atende cu e conflicto (bringamento) entre Dammers y e Presidente. E resultado ta un Presidente di Parlamento cu no ta goza di respet mas di Fraccion di AVP y un Fraccion di AVP cu ta haci deshaci den Parlamento. Den e reunion di Codigo Civil mes por mira con full e Fraccion di AVP a keda SIN PRESENTA pa e reunion y riba dje Ministernan Dowers y Croes a trapa riba nos Constitucion kedando SIN PRESENTA na Parlamento, faltando Pueblo respet. Tur e caos aki ta danki na Minister Eman su fayo di liderato.

Un Pueblo dividi
Por ultimo no por keda sin menciona con Minister Eman a keda scondi y laga pa un parlamentario di AVP cu su amienda dividi nos Pueblo grandemente. Minister Eman NO a worry ni sikiera pa atende cu e preocupacionnan treci dilanti pa ambos campo den e divicion aki. Eman parce di ta goza di e caos cu ela hinca nos Pais aden, pasobra si tabata otro, awe e Pueblo door di su gobernacion y liderato lo mester tabata uni y no biba den e caos cu ta reina na nos Pais.

29 augustus 2009

Expresionnan haci den e articulo aki no necesariamente ta refleha opinion di ArenaPoliti.co