Cu hopi disgusto y repudio, pero toch no asombra, UPP a tuma nota di e desaroyo riba e continuacion di e reunion di Parlamento tocante Codigo Civil, cu a keda cancela pa motibo di falta di quorum. Un falta di quorum cu a wordo casiona, pa prome biaha den historia,  pa e partido mas grandi di Parlamento esta AVP. E fraccion di AVP a dicidi di no presenta cu ningun miembro, ni sikiera pa duna splicacion kico ta motibo di ausencia. Despues si nos por a miranan cu caranan serio y rabia ta purba hustifica nan actitud y tirando culpa riba presidente di Parlamento. Mas tristo ta, cu hasta e dos ministernan, esta  sres. Paul Croes y Arthur Dowers, no a presenta, mustrando asina un falta di seriedad y mas ainda un falta di respet pa nos organo mas halto cu ta nos Parlamento. Como representantenan di gobierno, ya cu sr. Mike Eman mes tampoco ta duna honor na Parlamento, alomenos nos a spera nan presencia pa asina por lo menos sr. Dowers hustifica pakico e ta kere cu gobierno mester di mas tempo. 

Sin kier bay den e discusion di ken si ta “pro” of “contra” di e amienda proponi pa sra. De Sousa Croes, UPP ta haya necesario pa atende tanto pueblo di Aruba, pero tambe na e politiconan cu ta den Parlamento y den gobierno di e falta di respet cometi aki. Durante e siman cu a pasa, ora cu a duna e ministernan cu tabata den Parlamento e chens di bay bek y consulta cu gobierno, aparentemente nada no a pasa. Un biaha mas gobierno, bou guia di sr. Mike Eman, ta scohe pa e discusion severo y division den pueblo continua, sin cu gobierno di Aruba ta duna guia pa evita lo peor. UPP ta sospecha cu hasta kier pa e topico pasa e siman, pa asina por duna oportunidad pa bay celebra na grandi na San Nicolas pa loke ta trata e apertura di e “blender” na San Nicolas.

UPP a tuma nota cu siman a habri, cu tin yen di movecionnan straño y strategico, tanto den seno di gobierno, seno di partido AVP cu ta sostene gobierno, den seno di oposicion, den seno clerical y den e grupo di sosten di sra. de Sousa-Croes. Y keto bay nos ta haya falta di e informacion na nos comunidad, pa asina por yega na un discusion sano, sin e insultonan necesario di un banda pa otro. Hustamento esaki ta confirma e posicion di UPP “from day one” cu e discusion aki cuminsa, na momento cu sra. de Sousa-Croes a prensenta e amienda mas cu dos luna pasa. Den nos prome comunicado titula “Vox Populi Vox Dei” e momento ey, nos a mustra cu e issue aki ta uno FUNDAMENTAL cu ta rekeri un discusion nacional y cu ta rekeri pa wordo someti na huico di e pueblo. Nos a mustra tambe cu e decision final ta den man di parlamento, pero na unda un ley formal, cu a pasa tur conseho nesecario, ta wordo presenta y trata, y no den forma di un amienda durante di tratamento di cambionan den nos Codigo Civil. UPP mas di dos luna pasa a yega na e conclusion, y a haci un apelacion na e parlamentarionan cu a presenta y sostene e amienda aki, pa deshaci di esaki y encamina un trayecto mas habri y democratico. UPP a bay un tiki mas leu pa pidi e parlamentorionan pa bin cu un proposicion di orden pa deshaci of no acepta e amienda aki, pa asina hiba un discusion mas habri y dunanando pueblo tur oportunidad pa haya e informacion y hiba e discussion manera mester ta, basa riba e pensamento cu VOZ DI PUEBLO TA VOZ DI DIOS.

Un biaha mas UPP ta bolbe haci e apelacion na Parlamento pa bini cu un proposicion di orden pa no e trata e amienda, sino pa instrui gobierno, cu si nan ta wak esaki necesario, pa encamina e proceso di preparcion di un ley separa al respecto. Tambe por apela na e Parlamentario, si dado caso gobierno no tin pensa di haci esaki, pa e tuma e iniciativa y bin cu un proposicion al respecto.E actitud di no presenta na reunion ta muestra di falta di respet pa Parlamento y pa nos pueblo, pero tambe pa tur e gruponan envolvi. Sigur tambe na esun di LGTB.

UPP ta convenci cu e topico di cambionan den nos Codigo Civil riba su mes ta hopi pisa caba. Y manera nos di UPP a premira, e cambionan aki cu a tarda 5 aña pa prepara, ta bay perdi pa un discusion sin pia sin cabez, di apenas algo mas cu dos luna. Un discusion emocional cu diripente ta wordo presenta y cu ta pusha otro cambionan importante di nos Codigo Civil den background. Cambionan cu lo bay tin consecuencia tambe pa loke ta nos bida. Ta un berguenza pa mira, cu mas di 800 cambio proponi, no tin tur ministro presente na e reunion, particularmente e prome minister. Ta un berguenza pa mira cu di 21 miembro di Parlamento, unicamente 9 a hiba palabra, na unda cu uno cu ta contra di e amienda, no a percura pa vocifera su opinion den Parlamento. Den primera tanda esaki ta 20 minuut, loke ta nifica cu apenas 180 minuut a wordo dedica na e tratamento aki, y di cual mas cu mitar tempo a bay na e amienda. Pa un cambio asina grandi den nos Codigo Civil, UPP ta kere cu ta tur 21 miembro di Parlamento mester a hiba palabra. Poco poco ta keda demostra cu nos Parlamento tampoco no ta esnan mas indica pa completa e discusion aki cu tin andando.
Pesey UPP ta kere cu e cambio cu sra. de Sousa-Croes kier mira mester ta sepera for di e tratamento di e cambionan den nos Codigo Civil, y hiba na un manera mas democratico, los di tur maniobra cu di tur banda awor aki ta wordo haci. UPP ta kere tambe cu banda di para e amienda di sra. de Sousa-Croes, lo ta na su lugar pa sera e reunion di Codigo Civil aki y cuminsa esaki di nobo, pa asina ey duna chens na tur 21 miembro pa hiba palabra. Tambe cu envez 20 minuut den eerste rond 10 minuut den tweede, duna mas tempo pa un discusion apropia tuma lugar. Y pa ta mas habri, prome cu e reunion aki keda trata, bin cu un buelta di informacion na nos comunidad pa asina nan ta informa di e cambionan importante cu ta na caminda.


Lider di UPP
C.A.S.D. Wever
30 augustus 2016

Expresionnan haci den e articulo aki no necesariamente ta refleha opinion di ArenaPoliti.co