Andin Bikker (PDR): Cuatro amienda entre nan un historico lo wordo trata na Hulanda e otro siman
![AndinBikker10](/images/2016-press/AndinBikker10.jpg)
Delegacion di Parlamento rumbo pa Hulanda:
Den conferencia di prensa di Partido Democracia Real, Andin Bikker a menciona cu den e mesun viahe cu un delegacion di Parlamento lo emprende na Hulanda, otro siman unda lo trata diferente ley na Hulanda, lo trata atrobe e asunto di e leynan federal den Tweede Kamer.
Bikker a bolbe trece dilanti cu e mes a presenta un mocion unda cu nan a bisa cu cada bez cu nan ta bay Hulanda pa reunionnan interparlamentario, ta bon pa nan trata e leynan federal cu ta regarda nan paisnan, na momento cu nan tey.
No mester ta asina cu nos Parlamento ta trata nan via e-mail of cu nos no ta presente pa via di distancia. “E ora ey nan a bay di acuerdo cu e mocion aña pasa, y aworaki, a base di esey di 6 di Juni bay ariba, nos ta bay trata no menos cu cuater ley federal y den e cuadro di leynan ey, mi tin diferente amienda cu mi a traha caba, y Diabierna siman pasa mi a haya e grato noticia, cu Parlamento di Curacao tambe a manda nan delegadonan, y e tres amiendanan ta haya sosten di nan” Andin Bikker a declara.
El a añadi cu tur amienda tin un impacto grandi y beneficioso pa nos pueblo, pero un di nan tin su aspecto historico pasobra un di nan ta bay cambia su estatuto, pa Parlamentarionan di Aruba, Curacao y Sint Maarten, haya derecho di por entrega concepto di Leynan Federal na Tweede Kamer.
Esaki ta algo cu e Islanan di Reino Hulandes no conoce te awor, y si nos Parlamento kier bin cu un ley pa cambia algo riba nivel federal, nan mester bay via gobierno pidi pa Prome Minister entrega e peticion na Tweede Kamer.
“Awor, ken ta representante di pueblo? Ta nos, ta representante di pueblo. Pues, nos derecho di iniciativa ta algo sagrado y mi ta kere cu si nos tine den nos Constitucion, nos mester extende tambe riba nivel federal, cu nos tin e ora ey e libertad pa entrega conceptonan di ley Federal. Esey ta un di e amiendanan historico cu tin sosten di e Parlamento di Curacao, y nos ta sperando contesta di Sint Maarten pa wak si nan tambe ta inclina pa sostene e amienda aki, pero en todo caso ta bay ta un amienda historico y ta di spera awor cu TK ta bay di acuerdo cu e amienda aki, pa nos por haya como Parlamentario, e derecho adicional aki cu nos merece” ta palabranan di Andin Bikker.
Expresionnan haci den e articulo aki no necesariamente ta refleha opinion di ArenaPoliti.co