Fraccion MEP: Mocion di Aruba aproba den Tweede Kamer pa yega na un acuerdo di cooperacion den Reino riba e tema di abuso di hende muher y violencia domestico
Durante e tratamento di e Ley di Reino pa preveni y combati abuso contra hende muher y violencia domestico na Tweede Kamer di Hulanda, parlamentario sr. Ady Thijsen como delegado special representando Aruba a presenta un mocion den cual a boga pa e Paisnan den Reino yega na un cooperacion riba e tema di abuso di hende muher y violencia domestico.
Den e mocion a mustra riba e hecho cu ta importante pa Paisnan den Reino traha hunto pa por cumpli cu e Tratado di Instanbul di 2011 den cual Reino a bay di acuerdo pa haci lo maximo pa preveni y combati abuso contra hende muher y tambe violencia domestico. E exigencianan di e Tratado aki a keda formalisa den un Ley di Reino. Como cu Gobierno di Aruba tambe a pidi pa e tratado aki conta pa nos, a cuminsa cu un trayecto pa implementa e leynan necesario, pero nos no ta cla ainda. En bista di e importancia di e tema aki pa Aruba y e hecho cu e Tratado ta pidi Paisnan pa traha ampliamente cu otro pa por logra cumpli cu e meta, un cooperacion den Reino riba e tema aki ta na su lugar. Pa e motibo aki den e mocion a haci un apelacion na e Gobierno di Reino pa den cuadro di e Conferencia di Reino cu ta tuma lugar e siman aki na Curaçao, yega na un acuerdo di cooperacion riba e tema importante aki na bienestar di nos hende muher na Aruba y den Reino.
E mocion a keda aproba pa Tweede Kamer y awor ta toca turno na e Gobierno di Reino pa duna ehecucion na e mocion aki. Ta di spera cu durante e Conferencia di Reino e tema aki wordo trata y resulta den un cooperacion cu por yuda e trabounan cu ta wordo haci na nos Pais pa preveni y combati abuso contra hende muher y violencia domestico.
Expresionnan haci den e articulo aki no necesariamente ta refleha opinion di ArenaPoliti.co