Gobierno a prepara cambionan grandi den nos Codigo Civil. E propuesta di ley ta conta cu mas di 800 cambio hinca den 604 pagina di documentacion pa duna un idea di e magnitud di e cambionan presenta. Siman pasa Parlamento a cuminsa trata e cambionan aki, pero notable ta cu masha poco ta conoci den comunidad riba e cambionan aki, siendo cu for di aña 2010 caba Raad van Advies a pidi Gobierno pa brinda informacion riba e cambionan proponi cu lo tin consecuencia grandi pa e departamentonan di gobierno y e cuidadano pa cual e leynan aki lo ta aplicabel.

Falta splicacion dirigi riba e situacion di Aruba
Na 2010 ora cu Raad van Advies a brinda su conseho na Gobierno riba e ley, nan a splica cu e cambionan proponi pa Gobierno falta splicacion. Pa hopi cambio Gobierno a djies referi na e splicacion cu ta wordo duna den e Codigo Civil di Hulanda y no ta brinda un splicacion special pa e situacion di Aruba cu ta rekeri e cambio proponi. Banda di esaki Gobierno ta referi tambe na e historia parlamentario di Hulanda pa splica pakiko a opta pa haci algun di e cambionan. Mester remarca cu como un Pais autonomo den Reino, ta na su lugar pa nos tambe tin un splicacion special y acesibel pa e Codigo Civil di nos propio Pais. Y mas cu claro nos tambe mester por documenta nos propio historia parlamentario y no djies referi na esun di Hulanda, ya cu e historia di Hulanda no ta e historia di Aruba. Aki ta na unda cu Gabinete Eman ta faya di duna balor na nos propio historia y proceso di forma nos propio Pais.

A pidi Gobierno informa departamento y cuidadano
Den e mesun conseho di 2 di juni 2010, Raad van Advies a pidi Gobierno atencion pa e hecho cu e cambionan proponi lo tin consecuencia grandi pa e departamentonan di Gobierno cu ta atende cu e leynan aki, pero tambe pa e cuidadanonan di nos Pais. Pesey Raad van Advies a mustra Gobierno riba nan obligacion pa brinda informacion na un manera proactivo riba e cambionan proponi y nan consecuencia. Gabinete Eman den su contesta na Raad van Advies na aña 2012 a indica di duna atencion na e conseho aki, pero awor cu e ley aki ta wordo trata ta sali na cla cu Gobierno no a tuma e conseho aki na serio y no a brinda ningun clase di informacion riba e cambionan grandi aki den e 4 añanan cu a pasa.

Gobierno tin tur medio na su despocicion pa duna informacion
Mester remarca cu Gobierno tin tur medio na su despocicion pa por brinda e informacion necesario. Nan tin full e cuerpo di trahador publico na nan dispocicion na unda cu bo tin e departamento BUVO cu mester ta ekipa pa por brinda tur informacion di gobernacion. Banda di esaki Gabinete Eman ta conoci pa ta gasta miyones di florin di Pueblo den companianan di mercadeo pa filma y documenta cu articulo y potret cada paso cu e ministernan ta tuma. Den un scenario asina Gobierno no por bin cu excusa pa keda sin brinda informacion. Awor cu Parlamento a duna mas tempo promer cu sigi atende cu e Codigo Civil, Gobierno mester percura pa informa Pueblo di e cambionan grandi proponi, sigur pa locual ta trata e cambionan di fam, herencia y labor.

30 augustus 2016

Expresionnan haci den e articulo aki no necesariamente ta refleha opinion di ArenaPoliti.co