Minister Otmar Oduber a tuma nota di e relato di prensa di Conseho Consultativo (Raad van Advies) tocante su declaracionnan den sala di Parlamento relaciona cu un di e miembronan di e conseho aki. 

Na prome lugar, y e mandatario ta pone hopi enfasis riba e aspecto aki, e tin masha hopi respet pa e Conseho Consultativo, no solamente awor, pero semper. El a indica cu for di oposicion caba el a respeta e desicionnan di Raad van Advies (RvA), mescos cu ta e caso na e momentonan aki. Pa ilustra esaki Minister Oduber a declara cu den e ley di All Inclusive cu a wordo aproba recientemente, practicamente tur e recomendacionnan di RvA a wordo adopta y inclui den e ley cu a bay Parlamento, dunando asina tur respet na e organo importante aki. 

Loke e ta bisa ta cu na ningun momento mester considera un critica como un insulto, al contrario, mester dune e atencion debido y evita cu tipo di situacionnan cu el a referi na dje bolbe presenta.

Siguientemente, Minister Otmar Oduber a bisa cu e expresionnan den direccion di un miembro di Conseho Consultativo, den e caso aki Sr. Rik Timmer, no a sali for di su persona; nan a sali for di propio seno di Aruba Hotel and Tourism Association (AHATA) caminda cu e ex Presidente di AHATA a comunica via mailnan na su miembronan cu Sr. Rik Timmer lo ta den reunionnan di AHATA pa motibo cu e ta e representante di AHATA den Raad van Advies. Esaki ta textualmente loke ta skirbi den un di e mailnan en cuestion “Rick Timmer represent AHATA on several committees like the SER and I believe on the RAD VAN TOEZICHT and does not participate in regular meetings of the AHATA board and as any member (METACPRP) he has access to meetings as an observer and from time to time if the issues warrant them he is invited to board meetings as the AHATA rep on these organisms.”  Na Papiamento: “Rick Timmer ta representa AHATA den varios comision manera SER y segun mi den Raad van Toezicht y no ta participa den reunionnan regular di hunta di AHATA y como cualkier miembro (METAPRP) e tin acceso na reunionnan como observador y de bes en cuando si ta necesario e ta wordo invita na reunionnan di hunta como representante di AHATA den e organismonan aki”.

Ta e informacion aki ta loke Minister Oduber a trece dilanti den e reunion di Parlamento durante tratamento di ley di All Inclusive, es decir, el a cita textualmente e mail manda pa miembronan di AHATA.

Opinion di Minister Otmar Oduber ta cu Conseho Consultativo mester keda un organo di integridad hopi halto y ta a base di loke ta wordo comunica na un forma habri na miembronan di AHATA e mandatario a lanza e critica cu no por tin un conflicto di interes. Un biaha mas, den e mail ta bin dilanti cu Sr. Timmer ta den Raad van Advies como representante di AHATA, mientras cu e mesun organo aki ta dunando conseho riba e ley di All Inclusive, cual por wordo mira como un conflicto di interes inminente.

Teniendo na cuenta esaki, Conseho Consultativo no por tuma e critica di Minister Oduber como un insulto sino mas bien lo tabata bon pa nan tume como un observacion critico pa tene na consideracion. E mandatario lo a spera cu lo a pone mas atencion na e aspecto di conflicto di interes cu lo por tabatin akinan.

Den su comunicado Conseho Consultativo ta bisa cu Sr. Timmer no a forma parti di e reunionnan pa yega na un conseho relaciona cu e ley di All Inclusive, algo cu Minister Oduber ta aplaudi y ta demostra cu e organo di conseho aki ta sigui para pa su imparcialidad. Ta spera cu e aclaracion aki yega na e otro organonan cu tin e impresion robes di participacion di Sr. Timmer den RvA.

Expresionnan haci den e articulo aki no necesariamente ta refleha opinion di ArenaPoliti.co