Lider di MEP, sra. Evelyn Wever-Croes, a emiti e siguiente mensahe dirigi na sr. Mike Eman.

Sr. Mike Eman, cu un preocupacion inmenso mi a tuma nota con bo coordinadornan a busca confrontacion directo durante e manifestacion pacifico cu sra. Jacinta Thijsen a organisa dia 15 di oktober ultimo. Un senjora cu mi ta respeta hopi, cu a demostra un curashi pa expresa su preocupacionnan na forma pacifico y responsable.

Pero e situacion por poco a sali for di man, despues cu bo coordinadornan tabata pusha manifestantenan y forsa nan tuma un pamfleta di odio y mentira cu nan a wordo  instrui pa reparti. Tristo ta cu na ningun momento Sr. Eman a demostra responsabilidad cu un Promer Minister mester tin y stop e coordinadornan cu nan actuacion baho cu nan tabata tin cu e personanan cu a bin acompanja Sra. Thijsen. Cu e acto aki bo a demostra un biaha mas falta di caracter y falta di responsabilidad pa cu e pueblo. Den momentonan aki di crisis financiero cu Aruba ta pasando aden no tin espacio pa actitud baho di un promer minister cu su hendenan paga pa fomenta odio y division den pueblo. Den nomber di pueblo ami ta tene abo responsabel pa tur e danjo cu abo y bo coordinadornan ta ocasionando aki na Aruba.

Mirando cu riba e pamfleta di odio y mentira bo a hasimi 3 pregunta, mi ta ripiti mi contesta duna na prensa na varios ocasion atraves di e comunicado aki: Ami no ta ricibi ningun suma otro cu mi salario di parlamentario di pais Aruba. E cuentanan bancario cu abo a publica den e pamfleta ta cuenta bancario di un compania cu no ta dimi. Esaki ta cuenta di e compania cu ta parti di oficina di abogado Croes Wever Tchong cu entradanan totalmente legitimo. E simple hecho cu e transaccionnan ta pasa via banco ta muestra cu ta trata di transaccionnan legitimo y cu ta cai bou tur tipo di leynan y supervisionan manera cualkier otro cuenta bancario. Esaki ta algo cu abo como hurista tambe mester sa. Si bo tin indicacion cu algo no ta corecto, bai Ministerio Publico y entrega un denuncia.

Sr. Eman, den apenas 5 anja bo a redobla debe di nos pais di 40% te na 80% di nos GDP. Te aki 26 anja Aruba por yega bek na e nivel di 40% cu MEP a lag’e na 2009, pues lo dura 26 anja pa coregi e desastre financiero ocasiona den apenas 5 anja di Gabinete Mike Eman I y II. En bez di tuma e situacion aki na serio, Sr. Eman ta opta pa fomenta odio y division den nos pueblo. Sr. Eman ta sigi pone medidanan cruel ariba esnan mas vulnerable.  Nos cuidadanonan ta pasando den momentonan hopi dificil, y mester di lidernan cu curashi pa atende e problemanan cu seriedad y especialmente na forma responsabel. Manda coordinadornan busca confrontacion durante un manifestacion pacifico, y especialmente reparti pamfleta di odio cu mentira den dje, ta demostra e politica baho cu ta tipifica Sr. Eman su maneho. Sr. Eman por parti cuanto pamfleta baho di odio y mentira cu Sr. Eman kier, pero no ta cambia e berdad y realidad cu Aruba ta pasando aden. Stop di perde tempo valioso cu politica barata y cuminsa actua pa atende cu e situacion serio cu e pais aki ta pasando aden. Mi ta hasi un apelacion fuerte riba bo sentido di responsabilidad pa stop di busca confrontacion y division den nos pueblo. Nos pueblo merece mihor, mucho mihor.

Evelyn Wever-Croes

Oktober 15, 2014

Expresionnan haci den e articulo aki no necesariamente ta refleha opinion di ArenaPoliti.co