Nos tin problemanan sumamente serio dilanti porta. Nos clase trahado di Aruba a wordo buta na rudia pa GE I y II. E homber y muher humilde su derecho fundamental ta wordo trapa, esun di un bida cu dignidad no ta existi bao di e gobierno di AVP. No por papia mas di un clase media na nos isla pero un maneho neoliberal cu a resulta den cero poder di compra di nos pueblo. Gobierno nunca a elimina BBO manera priminti pero a aumenta costo di bida na un manera hamas bisto y pesey no ta publica cifranan concreto di CBS pa varios aña caba. Politica a drenta nos instituto y departamentonan pa tapa e mal maneho hiba desde 2009. No tin control di prijs y no tin interes tampoco pa regula esaki. Un mudamento di Waf atraves di un politica Anti-Pueblo y sin transparencia cu lo resulta den aumento di tarifa di container cu lo hiba nos na prijsnan impagabel.

Mirando e tantisimo negoshinan cu ta cera nan porta bao di e gobernacion di Sr. Mike Eman nos por conclui cu desempleo lo aumenta mas aun perhudicando mas hende. E situacion di nos trahadornan den e sector di Casino a empeora. No a haci nada riba e problematica aki y te awe e trahadornan di Aura Casino ta den incertidumbre y e fraccion berde cu tin mayoria no ta worry cu esaki. No a percura pa trece cambio den e leynan pa esaki no bolbe ripiti. Sindicato a vocifera nan preocupacion pero e Minister encarga Sr. Paul (Watsapp) Croes no tin interes den esaki. Sindicatonan a sali na defensa di e ley 1613x unda esaki ta duna e trahadornan cierto siguridad pero hasta esaki e Minister kier cambia den e Codigo Civil. Mas cu 800 cambio cu mester wordo trata cu seriedad y informa nos digno pueblo debidamente. GE II mester stop di sconde pa responsabilidad y haci e trabao pueblo cu ta exigi di e gobierno na mando.

E parti mas preocupante den e sector laboral ta e reapertura di nos refineria. Nos tin un sindicato cu no tawata activo pa varios aña, hasta por bisa cu nan a bira portavoz di gobierno enbes di para na banda di e clase laboral. Nos tur por corda con e modus operandi di dicho sindicato na ciere di e Refineria na 2012. Spera esnan cu lo aplica na e famoso Citgo Desk no lubida esaki. No ta ora pa "Para Wak" mas pero tuma e oportunidad laboral aki na serio cu bon representacion sindical. E formula con ta yega na salarionan den refineria tin cu cambia mirando cu nos hendenan tin hopi experencia den e industria aki y nos tin un economia basta avansa unda cu nos no por papia mas di 15 florin pa ora. Esaki ta salario nan marginal pa un refineria den siglo 21. Asina mes e lider di fraccion di AVP Sr. Rene Herdé ta papia di institucionalisa e dialogo social cu a faya e clase trahador den tur sentido. Mi lo keda critico riba full e proceso pa un bida digno di mayoria di nos pueblo cu ta nos clase laboral. Ta hopi sacrificio a wordo haci pa e derecho aki y nos no por bira lomba pa leynan laboral fuerte pa nos hendenan por biba cu dignidad y trankilidad. E unico partido cu a logra cosnan grandi pa nos pueblo trahador ta Movimiento Electoral di Pueblo, un partido Social democrata cu semper a lucha pa salvarguardia e dignidad humano. Solo el pueblo, salva el pueblo. Aruba mester un cambio pronto pa STOP tur e abusonan den e mercado laboral.

Expresionnan haci den e articulo aki no necesariamente ta refleha opinion di ArenaPoliti.co