Fin di 2015 y durante 2016, na varios ocasion, UPP a urgi na Parlamento di Aruba pa exigi for di gobierno pa trata e posibel reapertura di e refineria den un forma transparente, particularmente pa loke ta trata e acuerdo. Mientras cu fin di aña pasa y na mei ultimo nos politiconan, tanto esnan den gobierno y den Parlamento, incluso miembronan di oposicion, tabata “claim” e bon noticia aki como un logro di nan partido y a perde tempo valioso pa pleita ta di ken e logro aki ta, hopi aspectonan a keda sin claridad, te awo cu e ley a bin Parlamento pa trata. 

UPP a mustra caba na 2015 cu nos no tin problema na duna reconocimento na tur esnan cu a haci nan empeño pa logra habri e refineria. Apesar cu UPP su pensamento tabata ta cu e refineria riba su mes a pasa su tempo aki na Aruba y cu mester a pensa den algo mas sostenibel industrialmente, UPP a apoya un posibel reapertura, meramente for di e pensamento cu esaki por yuda Aruba su finanzas publico, e situacion financiero-economico cu Aruba ta aden. E ultimo aki, causa pa un gobierno cu no tabata sa con pa fiha su prioridadnan. Pues mas bien pa yuda alivia e situacion bou caul nos pueblo tabata y ta pasando aden y cu un menasa di mas medida.

UPP a urgi si, pa wak bon ki deal ta sera cu Valero, CITGO/PDVSA y cu Gobierno Venezolano. UPP a pidi pa e transparencia necesario pa asina nos por waki si e deal aki realmente ta combini Aruba.
UPP a bisa tambe cu por mira un menosprecio grandi pa nos Parlamento. Nos por a scucha splicacion di Mike de Meza, dicon na Venezuela si e acuerdo mester bay Asamblea Nacional prome, mientras cu na Aruba a scohe pa haci tur e dealnan prome y despues ora cu e acuerdonan wordo firma, nan ta bay Parlamento. Pues “mosterd na de maaltijd”. Mientras cu Parlamento a acepta esaki, nos por mira cu awe Raad van Advies ta bisa otro. Esta cu apesar cu gobierno ta acerca Parlamento pa un “machtiging” (apoderacion), pa por sera e contractnan cu tur esnan involvi, nos ta papia aki caba di un “fait a compli”, pues un “done deal”, un “mosterd na de maaltijd”. Loke Raad van Advies ta bisa ta, cu aki defacto ta pidi Parlamento pa un “bekrachtiging” (confirmacion, sosten) pa loke a wordo sera caba.
Por bisa cu Raad van Advies ta puntra kico ta e caracter legal di e apoderacion cu gobierno ta pidi Parlamento, awor cu ya tur cos ta firma caba. Pues henter e asunto di reapertura lo bolbe bay bira un spetaculo politico, cu a cuminsa caba cu e issue di “ter inzage”. Raad van Advies ta mustra cu nos ley di Comptabilidad no ta traha ni basa di e aspecto di pidi un apoderacion despues cu ya caba e negosacionnan cu tur partido a wordo hiba y estableci. E forma corecto ta cu mester a bin Parlamento prome y pidi apoderacion p’esaki.

Apesar cu e forma con gobierno y Presidente di Parlamento a trata Parlamentarionan di Pais Aruba dor di pone e documentonan, cu ta parti esencial di e ley cu lo wordo pasa, “ter inzage” . Apesar cu dos “watchdog” di gobierno, den teritorio di Parlamento ta wordo poni y cu por wordo considera como uno cu ta un insulto y no corecto, UPP ta bou di impresion cu ya caba for di algun tempo oposicion tabata tin e documentonan aki. Parlamentario di oposicion, sr. Glenbert Croes, laga sa  cu cualkier sea e contenido di contratonan, e posicion di nan como oposicion ta na fabor di reapertura di e refineria. Apesar cu esaki ta un “blender” y no un refineria. Tambe a enfatisa cu e contrato aki alomenos ta mihor cu esun di coastal. Pues di e manera aki ta duna muestra di sea ta bolbe bay yuda Gobierno sin mas y laga di pensa riba nos comunidad, pero pa pensa riba e siguiente eleccion. Pues no ta para keto realmente kico por ta beneficio pa nos pais, tanto pa loke ta su finanzas publico, e mercado laboral, medio ambiente y salud di e pueblo aki. Tur hende, incluso oposicion, a priminti pueblo un refineria completo y no coffemaker of un blender di segunda calidad.

Tur hende parce di ta cla pa sostene e apertura di e blender aki, pero no ta parando keto na e desaroyonan na nos pais ruman, Corsou, unda cu posiblemente un compania Chines lo ta willing pa hinca placa pa drecha e refineria y mientras cu Corsou a para tur combersacion cu PDVSA riba un posibel extencion di e contrato p’e refineria, mirando cu nan no tin e capital necesario pa inyecta.
Mientras cu tur atencion ta concentra riba e acuerdo cu tin awor aki cu CITGO/PDVSA, kico ta e otro acuerdonan cu tin cu por ehempel cu Valero? Kico Aruba mester a entrega pa por a haya e facilidadnan bek? Preguntanan cu tin cu pa UPP no ta cla ainda. Preguntanan cu mester wordo contesta, dor di haci e acuerdonan publico. Y asina nos por menciona mas di e inquietudnan cu ta existi, pero cu parce atrobe lo wordo pasa den Parlamento sin mas. Comprometiendo Aruba pa hopi aña atrobe na merced di un multinacional.

Lider di UPP
C.A.S.D. Wever
25 di september 2016

Expresionnan haci den e articulo aki no necesariamente ta refleha opinion di ArenaPoliti.co