Den rueda di prensa semanal di Partido Democracia Real,  Andin Bikker, lider di PDR a bisa cu gabinete Mike Eman II tin e democracia parlamentario di Aruba te na suela!

Na prome lugar pasobra siman pasa PDR a pidi un reunion publico pa trata e tema “husticia” y a bin un “bijeenkomst” caminda e parlamentarionan no ta haya oportunidad pa entrega mocionnan, pa asina duna indicacion kico nan ta pensa di e maneho di e minister.

Y awor, e siman aki, despues di lunas cu nan a negocia cu batayon di experto pa yega na acuerdonan, a bin cu ley pa e reapertura di e refineria y gobierno ta bin bisa Staten cu e leynan aki mester wordo lesa den Biblioteca, bao supervision di coordinadornan manera un mucha chiquito, loke tin e parlamentario mas cu indigna.

No ta trata di cualkier tipo di ley sino leynan cu ta pidi Parlamento pa aproba e acuerdonan cu ta wordo firma.

Bikker ta puntra gobierno con por bisa parlamento cu e miles di pagina cu nan a firma, nan tin di bay sinta den Biblioteca den oranan laboral, pasobra den fin di siman no por tampoco pa nan bay lesa kico tur e contratonan ta encera.

“ Tur fraccion a bisa cu NO, y nos a manda un carta cual, pa medio di Presidente di Parlamento, a bay pa gobierno. E carta ta bisa cu nos merece respet, cu nos tin derecho di wak e documentonan aki, pasobra raad van advies a haya nan. Nos ta representante di pueblo, Raad van Advies NO, y bo ta pidi nos aprobacion di loke bo a firma pero no kier pa nos sinta studia detajadamente, kico bo a firma, y tin otro organonan cu a haya e documentonan sin retriccion”, Andin Bikker a bisa.

E tin duda cu Raad van Advies ta bay sinta cu dos coordinador den Biblioteca den oranan di oficina, pa nan wak e documentonan aki.

“E excuse di gobierno ta cu e documentonan aki tin secretonan den nan cu si nan leak e partidonan cu a cera e acuerdonan aki, lo wordo perhudica.

Pero mi a sinta lesa e acuerdonan aki. Di e master agreements cu Citgo, di pagina 1 casi te cu 9, ta definicionnan. Kiermen, kico por compronde bao di nan terminonan, manera kico ta tanki di petroleo, azeta, etc. Pag.10 ta punta kico nan ta bay haci cu e casnan den Seroe Colorado; pag 14, kico ta bay haci cu loods y wegen, anto cu ATCO ta bay take care di esaki aparentemente. Den pag 15 ta puntra riba belasting. Ki tipo di belasting ta bay wordo paga. E Pag.19 ta papia di e leynan laboral, cu ta algo cu tur dia hendenan ta puntra riba dje, ki tipo di contrato Citgo lo ofrece e trahadornan, etc. Den pag.22 ta menciona garantianan cu a wordo duna. “Raad van Advies den su conseho ta bisa cu garantianan cu a wordo duna, nan no por cuantifica nan, pasobra a wordo duna, entre otro, garantianan cu si cualkier cos pasa, Pais Aruba ta responsable di tur cos. Andin Bikker a bisa cu e acuerdonan aki ta skirbi den lenguahe di “legal English” cu ta cosnan cu bo mester ta un abogado lesa dos pa tres biaha pa compronde bon kico a wordo acorda.

Segun Andin Bikker, Ministerraad, tur hunto den un osterizer, ningun di nan tin e experticia pa lesa e tipo di acuerdonan aki.

“Cu tur respet, ban compronde otro bon. Señor Eman Acte el a sinta lesa como Notario pero nunca el la bay door di acuerdonan di e magnitud aki. Señor Dowers, Abogado berdad gradua, pero na Hospital e tabata traha. Kiermen, den su profesion prome cu el a bira minister e no a bay riba e tipo di acuerdonan aki. Riba tipo di acuerdonan aki ta abogadonan specialisa y Gobierno tabata tin full un team local di abogadonan specialisa cu a sinta formula y negocia e acuerdonan aki.

“Awor gobierno ta bin demanda, of spera di Parlamento, den un par di dia nos mester bay door di cientos di pagina, caminda fin di siman tampoco no ta conta, y Dialuna Parlamento tin cu bay trata e ley aki.

“Tin otro cos cu ta un pret chistoso, pero cu eigenlijk bo mester jora. – E Umbrella dispute settlement agreement-. Kiermen, esaki ta e geschillenregeling y si nan haya cualkier disputa, nan tin un settlement agreement”.

Bikker a bisa cu Prome Minister a bay den welga di hamber pa un geschillenregeling, y awor pa e gobierno aki diripiente e documento nan aki a bira bedrijfgeheim.

E ta haya cu no tin ningun excuse pa e acuerdo aki y den tur e paginanan podise tres pagina, di 6 te 9, por tin un bijlage cu nan ta midi formulacion di petroleo, muestranan, etc.

“Esey por ta algo secreto, pero no ta un parti integral di locual nan ta pidi Staten pa aprobacion. Esey nan mag di keda cune, pero por lo demas di 25 pa 99% di e documentonan na Biblioteca no tin nada di bedrijfgeheim den nan. Y, ireversiblemente nan ta acopla na e ley. No por kita nan for di e ley pasobra nan no ta manera un presupuesto cu por  pone acerca cuanto auto gobierno ta lease, sino cu nan ta instrumental, parti integral pasobra bo ta pidiendo nos aprobacion, duna bo apoderacion pa sera e acuerdonan aki si nos bay di acuerdo cu e contenido. Dus ta imposible pa den un acuerdo asina bisa Parlamento cu nan no ta bay haya copia y bin cu excuse cu ta bedrijfgeheim” Andin Bikker a splica.

Expresionnan haci den e articulo aki no necesariamente ta refleha opinion di ArenaPoliti.co