Manera tur hende por a pronostica, nos parlamento riba 27 september 2016 a vota ‘VOOR’ pa e ley ‘CITGO’, y desde e fecha aki e campaña electoral ‘Pabien cu e ‘mehorador’ a cuminsa. Pero pueblo, ‘PABIEN’ cu of pakico?

‘Pabien’, cu a brinda pueblo un otro show emocional, sin sentido y sin contenido, pero si cu hopi insulto y intimidacion?

‘Pabien’, cu a trata di tuma pueblo haci cu nos parlamentarionan si por lesa, comprende un documento huridico, tecnico di mas di 2000 pagina, na Ingles y bou vigilancia den algun minuut?

‘Pabien’ cu a vota ‘VOOR’, sin cu tabatin tur informacion, documento of conocemento di e riesgonan di antemano. Anto pakico participa na e debate of vota ‘VOOR’?

‘Pabien’, cu a vota ‘VOOR’, pa despues bay informa CAft y Hulanda con ‘PREOCUPA’ nan ta di e ‘CITGO-deal’ (Solo, 27 september 2016)?

‘Pabien’, cu a vota ‘VOOR’, pa cumpra un ‘mehorador’ sin sa cuanto e ta costa y kisas lo habri aki 3 aña?

‘Pabien’, cu a vota ‘VOOR’, y asina exonera ‘Valero’ di su obligacionnan y alabes regal’e mas miyones?

‘Pabien’, cu a pone mas presion riba nos sociedad y infrastructura cu e yegada di ainda mas stranhero y cu tambe a mantene e fenomeno di ‘cheap labor’ intacto?

‘Pabien’, cu a logra bende un parti di pueblo cu 10 miyon di dollar na impuesto (despues cu gobierno a regala ‘CITGO’ 9 miyon florin) y kisas cu algun hende local lo por haya trabou, ta e ‘salbacion’ pa nos economia y nos debe biyonario cu nan mes a crea?

‘Pabien’, cu a logra sconde e informacion di pueblo cu locual pueblo lo paga na final pa e ‘mehorador’, Aruba por a construi un refineria moderno, compacto y ‘environmental efficient’ cu lo a genera hopi cuponan di trabou bon paga y duradero pa hendenan local pa hopi aña?

‘Pabien’, cu a logra pa e grupito privilegia por cobra su ‘finder’s fee’ miyonario atrobe?

‘Pabien’, cu a logra redobla e MEGA DEBE actual awor no den 3 aña, pero den apenas algun ora?

Preguntanan:

Dicon tur esunnan cu ta ‘claim’ e ‘logro’ pa e apertura di e ‘mehorador’, no ta bin splica pueblo cu e mesun briyo, cuanto esaki ta costa, con e ta wordo financia, di unda e placa ta bin y na ki interes y si nan ta dispuesto pa carga e responsabilidad personal tambe di a REDOBLACION DI E MEGA DEBE, net manera nan kier tuma tur e elogio pa e ‘LOGRO APERTURA MEHORADOR’?


(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co