Dia 27 september 2016, manera pueblo por a anticipa, tur fraccion den parlamento a voto ‘VOOR’ pa e ley ‘CITGO’, sin cu parlamento a haya tur documento: ‘ Dan had hij de Statenleden voorzien van ALLE contracten die een integraal onderdeel vormen van de wet (Solo, 29 september 2016)’. Akinan caba, pueblo tin cu haci su mes seriamente e pregunta: Con por legalisa retroactivo y asina mara pueblo na un aventura biyonario, sin cu tabatin tur informacion?

Pues atrobe parlamento a pasa un ley controversial cu no lo yuda nos economia, manera e kier laga bo persona kere, pero cu sigur lo REDOBLA e debe biyonario cu e mesun politiconan tradicional a causa. Esaki ta comparabel cu cumpra un auto bieu sin sa su prijs, sin sa si e ta core, pero pa simplemente broma cu bo tin un auto. Den bida diario, ningun persona ta haci algo asina. Ningun persona ta cumpra algo di antemano unda e prijs final lo wordo fiha aki 3 aña. Anto dicon nos parlamentarionan tradicional tin cu haci algo similar asina cu pueblo?

E observacion critico y sincero aki, no tin nada di haci cu si un persona ta PRO of CONTRA e reapertura di e refineria, manera e politico tradicional ta uzando como excuus pa tapa su COMPLICIDAD na un OTRO BARBARIDAD BIYONARIO cu ta sirbi solamente e interes di e mesun clase politico y e grupito rond di dje. E tin di haci cu INTEGRIDAD, SINCERIDAD y SANO HUICIO!

Lamentablemente ningun di e aspectonan aki, pueblo por a nota ni durante e tratamento di e ley of den e splicacion despues di e politiconan tradicional cu a REDOBLA ARUBA SU DEBE BIYONARIO DEN APENAS ALGUN ORA. Si e redoblacion di e debe nacional lo a afecta solamente e 9 ministernan y e 20 miembronan di parlamento cu a vota ‘VOOR’, anto no lo tin un problema. Pero e legalisacion retroactivo atrobe di un asunto biyonario hopi cuestionabel, lo toca y afecta nos tur y nos futuro generacionnan pa decadanan largo. E pueblo humilde no tin cu lubida cu e grupito aki, ya caba tin diferente beneficionan financiero cu a haci cu nan no ta sinti e medidanan financiero manera pueblo. Algun di nan hasta tin nan cas den exterior caba, unda nan lo por bay disfruta trankilamente di nan pensioen, mientras cu pueblo ta esun cu lo keda atras den e desaster cu nan a causa. Pa no lubida tampoco cu algun di nan, ya ta miyonario caba.

NINGUN DI E 20 PARLAMENTARIONAN CU A VOTA ‘VOOR’, POR BISA PUEBLO CUANTO E AVENTURA BIYONARIO AKI, LO COSTA E PUEBLO Y SU FUTURO GENERACIONNAN. Pues sin sa algo di e ‘Economics and Feasibility’ di e ‘mehorador’, nan a vota ‘VOOR’. P’esey ni cuanto esfuerso nan haci pa trata di bende pueblo cu nan a vota pa ‘SALBA’ e economia di Aruba y special esun di San Nicolas, e no ta zona logico ni creibel si nan no por bisa CUANTO PUEBLO TIN CU PAGA PA E ‘MEHORADOR’. Redoblando e actual debe biyonario, tumando tur e obligacionnan ambiental y asumiendo tur riesgo financiero pa haya 10 miyon dollar directo na impuesto y kisas un otro 20 miyon dollar indirecto, no ta ‘MAKE GOOD BUSINESS NOR COMMON SENSE’.

Den nos humilde opinion, e 9 ministernan y e 20 miembronan di parlamento cu a vota ‘VOOR’, mester a puntra pueblo, via un REFERENDUM, si e tabata desea pa SU DEBE BIYONARIO WORDO REDOBLA DEN APENAS ALGUN ORA PA UN ‘MEHORADOR’. Si pueblo por a biba 7 aña largo (y algun aña prome) sin un refineria, pero si cu hopi medida, anto pueblo lo no a muri si e mester a warda algun luna mas mientras e necesario y e corecto lo a wordo haci. Pues e argumento di urgencia no ta valido. Es mas, ‘haastige spoed, is zelden goed’ y nos DEBE BIYONARIO ta e testimonio visibel di esey.

Husto nan cu a crea e debe biyonario actual, cu nunca ta consulta of informa pueblo, cu no ta respeta pueblo su opinion, cu no ta transparente, cu no ta sincero y cu a percura pa Aruba perde su autonomia financiero pa nan presupuestonan ficticio y nan incapacidad, NUNCA por a tuma un decision di tal magnitud. E 20 miembronan di parlamento cu a vota ‘VOOR’, MESTER A CONSULTA CU PUEBLO PROME CU NAN A TUMA E DECISION PA REDOBLA E MEGA DEBE. AWOR SI, ARUBA SU MEGA DEBE A CABA DI EXPLOTA!


(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co