Refineria ya ta den proceso di rehabilitacion. 

ORANJESTAD - Durante conferencia di prensa Prome Minister Eman a repasa algun punto di atencion pa loke ta refineria CITGO y su reapertura. Hopi ya a wordo bisa, skirbi, cuestiona, discuti, delibera, pero asina mes semper ta keda preguntanan den aire cu falta mas splicacion. Dia 1 di october CITGO a bira e operador oficial di e refineria y e mesun dia e compania estatal Refineria di Aruba NV (RDA NV) a keda estableci. Prome Minister Eman a anuncia cu masha orguyo cu sr. Alvin Koolman a bira e prome director general di RDA. "Nos ta sumamente orguyoso di por a haya un Arubiano cu a contribui grandemente den e proceso y hunto cu e demas miembronan di e team di colega de Meza yega na un acuerdo awe unda tin un operador pa maneha nos refineria."

Desde 1e di october e acuerdo di lease cu CITGO a drenta na vigor. Ta varios acuerdo a keda cera durante e ultimo lunanan. Prome e acuerdo cu CITGO cu a wordo firma na mei, sigui pa e acuerdo cu Valero na augustus pa despues bay Parlamento pa pasa e leynan pa autorisa gobierno pa asina tur e acuerdonan keda formalisa y drenta na vigor. "Tur esaki a tuma luga y awor cu cosnan a bira un realidad y cu refineria ta di Aruba, cu pa 1 di october el a wordo geleased cu CITGO ta importante pa para keto y realisa e impacto cu esaki ta nifica pa Aruba. Un impacto enormemente positivo." Eman a splica den detaye un bes mas con Aruba tabata para na 2009. Parando riba un mita pia, pasobra e isla aki tabata depende solamente di turismo, ya cu e tempo ey caba Valero a para su operacionnan y  turismo a cay cu casi 30% pa motibo di e impacto internacional door di e crisis mundial, e gobierno cu a caba di tuma rienda, mester a maneha e situacion penoso cu el a bin haya."E situacion tabata uno sumamente debil, fragil y entrada di gobierno a cay dramaticamente e tempo ey y riba dje tabatin un refineria cu no tabata den operacion."

"Awe shete aña despues nos por bisa cu nos turismo a crece cu mas di 30% te yega na 1,2 miyon bishitante pa aña. E RevPar cu ta un di e puntonan di referencia mas importante pa midi e balor di nos pais como destinacion turistico tambe a subi cu 30%. Den esaki nos Minister di Turismo Otmar Oduber hunto cu ATA a haci un tremendo trabou pa awe Aruba ta para den e posicion ey. E otro mita pia di e economia a wordo recupera. Nos a inverti hopi pa duna impulso na nos economia por a recupera y ora esaki tabata  completo nos por a cana den direccion di un pais cu un economia sostenibel cu por wordo comparti cu nos ciudadanonan den e miho forma."

Eman a bisa cu awe cu e reapertura di e refineria a bira un realidad y cu ya caba e biddingnan ta ey ’fo pa rehabilitacion di e refineria y cu esaki regreso di e di dos pia di nos economia ta un hecho. E refineria ta representa entre 12,4% y 15% di e GDP. "Tur e añanan cu ta tras di lomba nos mester a traha sin dje. Asina mes ta un hecho tambe cu unda bo core rond na Aruba bo ta mira cambio, bo ta mira progreso y inversion. Tur esaki nos a logra di haci sin e refineria den funcion. E refineria ta bek y ta representa e 15% di nos GDP."

Expresionnan haci den e articulo aki no necesariamente ta refleha opinion di ArenaPoliti.co