Un otro medida di Gabinete Eman. 

Conbersando cu hopi hende ultimamente, mi ta haya hopi preguntanan y precupacionnan cu ta sali for di e pueblo. Hopi hende ta aserca mi cu e pregunta tocante placa di belasting y ta puntra ta dicon nan no ta haya placa di belasting bek mas. Mi ta kere cu ta importante pa aclarea esaki.

T’asina cu antes, parehanan casa tabata haya placa bek di AOV. Pero awor esaki no ta e caso mas. Nos ta papiando di un suma cu por yega te cu 7 mil florin pa aña.
Ademas di haya placa di AOV, nan tabata haya placa bek di inkomstenbelasting ora cu nan a paga hopi interes riba hipoteca di debenan.

Mayoria di e parehanan aki tabata conta cu e placa aki pa paga nan grondbelasting of erfpacht. Ta asina cu esaki ya no ta asina mas pasobra ley a cambia. E situacion aki a causa cu hopi di e hendenan aki a cay den problema financiero.

Kico ta loke a causa cambio aki?

Na aña 2011, Gabinete Mike Eman a cambia e ley di AOV. Ya no ta haya placa bek. El a separa e prima haciendo cu esaki ya no ta conta pa pareha mas sino pa cada persona individual.
Consecuentemente, antes si e pareha ta haya placa bek pasobra hunto nan tabata paga dimas, despues cu e la wordo separa, nan no ta paga dimas mas, y nan no ta haya placa bek tampoco mas.

Esaki ta un di e medidanan cu Gabinete Mike Eman a bin cu ne pa fortifica e fondo di AOV y tambe pa purba mehora e situacion financiero malo cu e Gobierno a causa.

Gobierno no a tene cuenta cu e hecho cu hopi hende tabata spera riba e placa aki p’asina nan paga e grondbelasting y erfpacht y otro gastonan. Y desde aña 2011, Gobierno di Mike Eman a bin cu e medida drastico aki cuasando un efecto financiero hopi duro pa varios famianan na Aruba.  

Expresionnan haci den e articulo aki no necesariamente ta refleha opinion di ArenaPoliti.co