Pueblo mester haya un bon splicacion di Eman. 

Siman pasa diabierna e nombracion di e Gobernador nobo pa Aruba a keda conoci den persona di sr. Alfonso Boekhoudt y sra. Yvonne Lacle-Dirkz como Gobernador interino. Pa locual ta trata e nombracion di Gobernador, esaki tabata un sorpresa ya cu normalmente ta Gobierno di Aruba ta propone tres nomber y Hulanda ta bay di acuerdo pa nombra un di e personanan aki como Gobernador di Aruba. Pero pa stranio cu e por zona, e biaha aki Hulanda no a bay di acuerdo cu ningun candidato pa Gobernador sugeri pa Minister Eman y a djies nombra un otro persona. Esaki ta algo hopi inusual pa cual Pueblo mester bay haya un bon splicacion di Minister Eman.

Minister Bermudez tabata e candidato preferi
E ta conoci cu e candidato preferi pa Gabinete Eman pa e pocicion di Gobernador ta Minister Bermudez. Pesey na momento di sugeri nomber na Hulanda pa e nombracion a pone na promer lugar, sr. Angel Bermudez, sigi pa sr. Ike Posner y despues pa sra. Glenda Margareta. Manera custumber ta for di e lista aki di 3 persona, Hulanda lo mester a nombra e Gobernador pa Aruba y usualmente e promer persona riba lista ta wordo nombra como Gobernador. Pero e biaha aki Hulanda no a acepta pa nombra ningun di e personanan aki y a bypass Minister Eman pa nombra sr. Alfonso Boekhoudt como Gobernador pa Aruba.

Hulanda ta wals riba Minister Eman
E ta masha remarcabel cu Hulanda cu semper a tene cuenta y nombra e persona cu Gobierno di Aruba ta propone, e biaha aki no a haci’e. Di e manera aki e desconfiansa di Hulanda den Eman ta bira mas visibel y debi na su falta di seriedad den gobernacion di nos Pais, awor Hulanda hasta ta bira wals riba Minister Eman cu e nombracion di un otro persona como Gobernador di Aruba. Tristo den tur esaki ta, cu largo bay Minister Eman a haci trabou di loopjongen pa Hulanda gabando su bon relacion y cuanto admiracion nan tin pe na Madre Patria y awe pa algo asina comun manera scohe di un lista di tres candidato pa Gobernador, Hulanda a bira bypass Eman y bira wals riba dje tambe nombrando un otro persona cu Minister Eman no a sugeri pa e pocicion di Gobernador di Aruba.

Minister Eman mester splica
Awor cu Hulanda a bolbe wals riba Minister Eman, e mandatario aki mester bin duna Pueblo un bon splicacion ta con bin esaki ta posibel. Pueblo no ta interesa den un otro show di welga di hamber, ya cu hasta e mata na Fort Zoutman a cay caba, ma nos kier un bon splicacion ta dicon Hulanda no kier mira Minister Bermudez como Gobernador di Aruba. E ta sigur un berguensa cu Aruba ta wordo goberna pa un Gobierno y un Minister President Eman cu ni pa e cosnan mas comun por saca cara y planta respet den nomber di nos Pais.

8 oktober 2016

Expresionnan haci den e articulo aki no necesariamente ta refleha opinion di ArenaPoliti.co