E ta tristo pa mira con Ministernan y Parlamentarionan di AVP ta purba laba nan man di e supervicion di CFT. Largo tempo nan a bati man pa e bon relacion cu nan lider Eman tin cu Hulanda y nan a bay di acuerdo cu tur protocol cu Minister Eman a firma cu Hulanda, sin cu Parlamento a debati promer cu e mandatario a firma nan. Anto awe cu e consecuencia di tur e freimento y firmamento cu Hulanda a presenta den forma di supervicion di CFT, AVP kier laba su man di CFT tirando culpa riba opocicion.

For di momento cu Minister Eman, sin informa Parlamento promer, a bay firma e Protocol di Cooperacion cu Minister Donner di Hulanda na oktober 2011, nos a adverti Pueblo cu Minister Eman ta entrega nos autonomia bek na Hulanda a cambio di e promesa di un saco di placa pa por keda na poder. Na maart 2013 e mesun Minister Eman hunto cu Minister De Meza a firma e Protocol di Diahuebs Santo hunto cu Hulanda den cual nan a specifica e condicionnan pa por recibi e saco di placa aki. Entre e condicionnan tabata tin e supervicion di CFT cu Eman ni de Meza tabata tin curashi pa laga pone riba papel. Pero na februari 2014 tabata asina lew cu Hulanda mes a pone riba papel y cu e propio Minister Yrausquin a firma ‘geen bezwaar’ pe. Pa no lubida cu Minster Bermudez mes a firma na december 2014 pa pidi CFT pa duna su opinion riba presupuesto 2015. Pesey e hecho cu CFT awe ta na Aruba no a cay for di shelo. Ta e propio Ministernan di AVP a firma pe y e propio parlamentarionan di AVP a bati man pe.

Pero manera semper AVP ta busca moda di laba man y tira culpa riba otro. Asina nos por a scucha Minister Bermudez declara den su encuentro cu Parlamento, cu e no a palabra nada cu CFT y no sa dicon CFT a manda conseho sin wordo puntra pe. En corto, Minister Bermudez a laba man di e asunto di CFT. Di otro banda, e Parlamentarionan di AVP kier plak CFT riba opocicion bisando cu ta opocicion a bay lobby na Hulanda pa trece CFT na nos Pais. Un mentira flagrante, ya cu firma di nan propio Ministernan Eman, De Meza, Yrausquin y Bermudez ta sirbi como prueba pa Pueblo cu ta AVP mes a firma y bay di acuerdo pa CFT bin nos Pais pa keda.

21 april 2015

Expresionnan haci den e articulo aki no necesariamente ta refleha opinion di ArenaPoliti.co