Manera nos a bn ta senjalando turismo ta den problemanan hopi serio. Na momento cu te hasta e cantidad di turistanan cu ta bishita nos pais ta conoce un caida manera a pasa den luna di September ta motibo di preocupacion serio. Den luna di September 2016 Aruba a conoce un caida di nada mas y nada menos cu 20.5% den cantidad di bishtante. Esaki ta un golpi hopi duro pa esnan cu ta traha den e sector turistico. Tur hende den e industria ta sintiendo e efectonan aki. E caida no ta solamente for di turistanan for di Venezuela manera cu minister Otmar Oduber kier pretende sino tin caida di turistanan for di practicamente tur otro pais. Venezuela a conoce un caida, Canada caida, Brazil caida, Hulanda y asina por keda menciona tur otro destinacion cu a cai grandemente. Locual ta preocupa nos ta hecho cu e anja aki 2016 a inverti casi 80 miyon florin den mercadeo di pais Aruba. Ora mira e return on investment di e 80 miyon aki simplemente e no tey. Den pasado tawata inverti un maximo di 26 miyon florin na mercadeo y e resultado tawata practicamente identico den cantidad di bishitante. Ora gobierno ta papia cu e REV PAR a aumenta esaki ta motibo cu gobierno a impone un aumento drastico di Room Tax pa asina por haya mas entrada pa ATA BANK.

Nos mester constata cu e ultimo 3-4 anjanan Otmar Oduber no a haci e trabou cu e mester haci den nos turismo. Nos pais NO a conoce un adelanto, nos no a conoce ningun proyecto di 5 strea y cada anja cu pasa e calidad di turista ta birando menos. Actualmente cada turista ta gasta averaha $100 menos durante nan estadia. Nos mester por conclui cu un caminda e maneho di Otmar Oduber ta fayando y nos no por sigui den e direccion aki. Nos mester refocus y percura pa nos tin un industria turistico solido y duradero. Un turismo fuerte caminda nos pueblo por mira e beneficionan di esaki. Ta lamentabel con nos turismo ta actualmente caminda tur indicador ta negative. Nos tin un caida den cantidad di bishitante, caida den REV PAR, caida den grado di occupacion di hotelnan, caida den cantidad di placa cu turistanan ta laga atras y te hasta caida den entradanan di ATA BANK. Si e situacion sigui manera cu e ta bayendo pa otro anja ATA BANK ta corre risico di perde placa pa promer biaha. Si esaki no ta crisis, si eesaki no ta motibo di preocupacion mi ta kere e ora simplemente gobierno a bira ciego y sordo pa e realidad. Si nos turismo no ta loke nos kier pa e ta nos no mester busca excusa. Nos mester tuma e accionan y pasonan necesario pa mehora esaki. Mi ta sinti cu minister Oduber no kier accepta cu nos turismo ta den problemanan hopi serio. Pa 2 anja caba nos turismi ta den problemanan hopi serio mirando cu pa 2 anja tawata tin crecementonan ficticio cu nunca por a wordo considera un crecemento real. Awe no solamente turismo du Venezuela a cai sino tur otro destinacion. E caida drastico aki ta afectando nos sector y tur esnan cu ta labora den turismo y ta dependiente di e desaroyo di nos turismo pa nan entrada. Aruba mester un gobierno cu ta percura pa nos turismo ta solido y duradero!

Expresionnan haci den e articulo aki no necesariamente ta refleha opinion di ArenaPoliti.co