Conclusion: Mike Eman mester paga Aruba tur gasto di su ultimo viahe pa Hulanda bek. Su viahe relaciona cu nombramento di Gobernador, Ministro di Finanza mester percura pa cobr’e. El a bay te Hulanda pa haci su mes ridiculo. Lamentablemente cu e ta pone Aruba su cara na berguensa tambe ora e haci esey.
Decision: Riba 7 di oktober ultimo Gobierno di Reino a nombra sr. Alfonso Boekhoudt como e proximo Gobernador di Aruba y a comunica esaki na Mike pa medio di un fax. Esaki ta despues cu Mike a haci un fiasco di e proceso y procedura pa cu nombramento di Gobernador.
Viahe: Mike a dicidi di bula pa Hulanda pa exigi Gobierno di Reino pa hala su decision aden. Esaki pasobra Mike ta contra cu ta un persona di San Nicolas a keda nombra. Nos tur sa cu esey lo no pasa, pasobra e nombramento a wordo firma p’e Rey, un Decreto Real, un ‘Koninklijk besluit’. Un viahe cu no a duna ningun resultado y a costa Aruba hopi placa.
Gasto: E tristo ta cu Mike no a bay su so. El a hiba Benny y e Secretario di Conseho di Ministro cun’e. Pakico? Ningun hende no sa! Riba dje el a hiba un miembro di prensa cun’e, riba custia di pueblo, cu placa di pueblo. E delegacion aki a keda tres dia Hulanda, a bula ‘first class’, a keda den hotel masha caro mes y a ricibi ‘daggeldvergoeding’. Na tur, gasto innecesario. Esaki mientras tin necesidad real den nos comunidad.
Necesidad: Mientras Mike ta gasta placa pa loco, pasobra e ta contra un Arubiano di San Nicolas, tin hende cu tin mester di ayudo financiero di berdad aki na Aruba. Por pensa por ehempel riba Baby Lunah, famia Koolman y tur mayor cu no por paga schoolgeld.
AVP: Enbes cu fraccion di AVP stop e locura di Mike y exigi p’e paga tur gasto di e viahe bek, e ta yama un ‘vragenuur’ den Parlamento. AVP tambe ta duna sosten awor na Mike contra e Arubiano di San Nicolas. AVP tabata contra re-apertura tambe di refineria, pasobra AVP no kier pa San Nicolas desaroya. Awor AVP tambe ta contra hende di San Nicolas.
Recomendacion: Dialuna fraccion di AVP mester exigi pa Mike paga tur gasto di e viahe ridiculo bek. Mester exigi Mike pa atende cu combati criminalidad cual ta e prioridad number uno awor aki. Mas na su lugar ta, pa exigi Mike pa disolve Parlamento y yama eleccion of bay Gobernador y entrega retiro di su Gabinete.

Expresionnan haci den e articulo aki no necesariamente ta refleha opinion di ArenaPoliti.co