E luna aki tin 2 tienda mas den Caya Betico Croes lo sera nan portanan y asina yega na e total di 42 tienda sera na e momentonan aki. Na varios occasion nos a bishita Caya y a combersa cu empleadonan y comerciantenan. Tur cu nos a combersa cu nan a bisa nos cu 2 factor a hunga un rol grandi den e caida di benta y tambe cierre di masha hopi tienda mes. Un di nan ta e tram cu no ta funciona y no a percura pa trece turistanan den Caya Betico Croes pa haci compras y mas bien ta stroba trafico circula den Caya. E otro factor tambe ta hopi bon conoci serca gobierno ta Aruparking. Na momento cu Aruparking a wordo introduci comerciantenan a bai atras drastacicamente den nan entradanan. No solamente nan a bai atras den nan entradanan sino 42 tienda a sera nan portanan caba. Comerciantenan a cansa di sinta na mesa cu gobierno pa yega na un solucion. E peticion di comerciantenan ta bon conoci serca gobierno pero lamentablemente gobierno NO kier duna oido na e peticion aki. Nan ta prefera laga Caya Betico Croes sigui sangra y sigui sera nan portanan envez di actua y tuma accion. E cierre di cada negosgi tin efecto riba nos economia. Ta mama y tatanan di famianan ta perdiendo trabou ora un tienda sera su portanan. Ta hopi tristo ora bo ta constata cu gobierno no kier actua y hopi ta esnan cu ja caba a perde trabou pa motibo di Aruparking y e tram. Gobierno na su turno mes ta perde hopi entrada na momento cu un tienda sera su portanan.
Nos ta sumamente preoucupa cu e situacion cu tin den Caya Betico Croes caminda e negilgencia, e terkedad y e arrogancia di e gobierno aki a mata Caya. Nos ta exigi gobierno pa tuma accion y haci algo di inmediato. Nos ta pidi gobierno pa habri Caya bek pa trafico por circula entre 4 PM y 6 PM. Tambe lo mester haci algo cu e parkeermetersnan aki pa evita cu mas tiendanan ta sigui sera nan portanan. Na Hulanda den diferente gemeente a cuminsa elimina parkeermeters y a nota cu manera cu esaki a sosode tiendanan a mira un cambio den nan benta nan. Nan benta nan a conoce un aumento drastico y tin hopi mas movecion di hende y trafico. Loke ta wordo bisa tambe ta cu kitamento di parkeermeters ta trece mas bida pa Caya Betico Croes.
Ta hopi tristo pa mira un decadencia den Caya caminda no tin movecion di hende, no tin movecion di trafico, no tin benta y tampoco tin mantencion di Caya mes. E fonteinan cu a costa nos pueblo miyones di florin aind no ta den funcion y asina por nota e negligencia inmenso di gobierno. E proyecto di tram ta un fracaso completo caminda a cumpra 4 tram cu un costo di mas cu 12 miyon florin y e ruta orginal cu e tram mester a corre nunca a mira lus di dia. E tram lo mester a pasa den Wilhelminastraat pa asina hacie posibel pa mas tram por corre na mes momento. Esaki nunca a pasa y asina cada bez ta 1 tram so por corre. E ora ta puntra pakiko derocha asina tanto placa den 4 tram si den practica 1 so ta wordo usa? Asina nos pais a wordo goberna y a yega e momento pa bisa, TA BASTA CU AVP! 

Expresionnan haci den e articulo aki no necesariamente ta refleha opinion di ArenaPoliti.co