ORANJESTAD – Ayera mainta Fraccion di MEP a bishita Caya Betico Croes pa ilustra e situacion di crisis cu ta reinando desde cu Gobierno a cuminsa embeyece Caya Betico Croes y cu e introduccion di e parkeermeternan september aña pasa, e situacion a bira pio.

Despues di nos conferencia di prensa, nos a bishita cada tienda pa asina entrega un carta pa pidi e comerciantenan cooperacion pa asisiti of laga nan empleandonan asisti na e marcha di siguridad cu lo ta diahuebs 29 september.
Nos por a constata cu ainda tin un preocupacion enorme ta biba no solamente serca e doñonan di negoshi pero tambe serca e trahadornan di e diferente tiendanan cu ainda ta maneha pa tene nan portanan habri!
Comerciantenan ta preocupa cu e situacion aki y hopi no ta mira un solucion na caminda. Financieramente nan no ta logra nan meta pa falta di bishitantenan cu e poder di compra den nan tiendanan.
Tambe nan tin problema pa cu criminalidad. Varios di e tiendanan ta tapa cu plywood pa motibo cu malechornan ta kibra den e lugarnan aki.
Comerciantenan ta laga sa cu na cuminsamento Gobierno a priminti siguridad den dia y anochi na e comerciantenan. Sinembargo esaki tabata solamente promesanan bashi di Gobierno di Mike Eman.
Gobierno no ta scucha e sugerencianan y proposicionnan cu e comerciantenan ta duna. Nan a sugeri, entre otro, pa habri e caya pa algun ora di dia, pa pone parkeo liber mas central of elimina esaki por completo. Sinembargo Gobierno no ta haciendo nada pa alivia e situacion caotico cu ta reina den Caya Betico Croes.
Na varios ocacion partido MEP a propone na Gobierno cu e solucion pa trece bida bek den centro di nos ciudad ta pa habri Caya Betico Croes bek, pa auto core atardi y anochi despues cu e tiendanan cera nan portanan y elimina parkeermeternan por completo.

Expresionnan haci den e articulo aki no necesariamente ta refleha opinion di ArenaPoliti.co