Durante TEDx Aruba 2016, ta duna un splicacion detaya di scolnan di ‘Steve Jobs’ 

ORANJESTAD - Fin di e siman aki TEDx ta start cu su discursonan cu oradornan prominente di tur parti di mundo. Dialuna den oranan de merdia a yega Aruba e conocido Maurice de Hond, kende ta bin duna un splicacion di e scolnan Steve Jobs cu a wordo desaroya segun su concepto  y metodo. E enfoke di e scol aki ta cu e individuo y su talentonan ta para central.

Ex-Minister Richard Visser ta e persona di contacto di sr. de Hond aki na Aruba. El a splica cu e scolnan aki ta cay bou di un plan mas grandi, esta crea un pilar economico basa riba conocimento. "E ta un vision di e gobierno aki, un vision pa amplia riba e pilar aki di conocemento y di tecnologia." El a splica cu el a drenta den contacto cu de Hond y su scol pa motibo cu e tabata buscando un scol pa su yiu, pasobra cu door di nan biahamento continuo e y su partner mester a busca un solucion pa e yiu por bay un bon scol. Buscando mi a bin haya e scolnan Steve Jobs y asina e contacto cu Maurice de Hond a nace y despues a fortifica. "Mi a pensa mesora cu e metodo di guia hobennan segun e concepto aki ta algo cu mester wordo introduci na Aruba. Mi a papia cu Maurice y asina nos a traha riba dje. Nan no mester bin solamente na Aruba, pero tambe den Caribe y Latino-America. Asina mi a bira e representante pa Steve Jobs School pa henter e region aki. Naturalmente mi kier haci Aruba e punto central di e proyecto aki."

Visser a bisa cu el a tuma contacto cu rector di Universidad y tambe cu Bureau Innovatie mescos tambe diferente scol aki. "Tambe mi a papia cu Minister di Educacion Hooyboer, cu Prome Minister Eman, SETAR, Digicel, cabesantenan di scol y tur tabata sumamente interesa. " Visser ta bisa cu rapportnan cu a wordo traha ta mustra cu nos  scolnan ya no ta apto pa nos muchanan mas. Cu e Steve Jobs scolnan Aruba por haci un ‘inhaalslag’ y asina produci studiantenan cu por competi na Hulanda, Merca y otro parti di mundo. "Esaki ta hopi importante pa Aruba y pronto ta bay tin cinco scolnan piloto loke ta e comienso di e pilar nobo cu nos kier trece."

Expresionnan haci den e articulo aki no necesariamente ta refleha opinion di ArenaPoliti.co