Desde cu Gabinete Eman a yega na poder na november 2009 hopi a cambia na Aruba y no necesariamente na beneficio di nos Pais. Hopi ta comenta cu nos mundo parce di ta bay riba su cabes, na unda hasta ta bay asina lew di kier cambia historia di nos Pais. Asina nos por constata cu desde cu Minister Eman ta na mando na nos Pais su gobernacion ta hibando un lucha pa purba kita Betico Croes for di e memoria di nos Pais. E motibo ta simpel, Betico a mustra nos cu nos Pueblo tin balor y ora cu nos uni nos por logra cosnan grandi pa nos Pais. Na momento cu bo haya hende ta purba trapa, bagatalisa of sconde e nomber di Betico Croes, ta pasobra nan no kier pa e Pueblo aki ta conciente di su balor y tampoco di su forza den union y ta prefera pa nos Pueblo bira indiferente, ta dividi pa asina por wordo maneha y esclavisa na nan antoho. Ta esaki ta e motibo pakiko ta purba kita Betico Croes for di e memoria di nos Pais. Ta esaki ta e motibo pakiko tur locual ta carga e nomber of ta relaciona na Betico Croes tin cu wordo atacha, elimina of somete na critica negativo. Aki ta sigi ehempel di e esfuersonan di Minister Eman y su colleganan pa caba cu e memoria di Betico Croes.

No usa Plaza Betico Croes pa ceremonia importante di nos Pais
Manera cu Minister Eman a yega na mando ela percura pa e actonan ceremonial di nos Pais wordo celebra dilanti Bestuurskantoor pa asina evita di haci uso di e Plaza cu ta hiba e nomber di Aruba su Libertador Betico Croes. Hasta dia cu nos a celebra 25 aña di Status Aparte di nos Pais, Gabinete Eman a organisa e acto di conmemoracion na rotonde di Paradera, pa asina purba manipula e mente di nos Pueblo cu ta otro hende a logra e Status Aparte y di e manera aki evita di rindi honor na Betico Croes kende ta e politico cu realmente a logra e Status Aparte pa nos Pais.

Liga e nomber di Betico Croes na critica negativo
E ta remarcabel con Minister Eman y su colleganan ta evita di usa e nomber di Caya Betico Croes ora di referi na e caya principal di Oranjestad. Nan kier hinca den mente di hende pa yame Caya Grandi of Mainstreet, djies pa no mester usa Betico Croes su nomber. Nan a laga contratista con cu ta, traha kiko cu ta, djies pa somete Caya Betico Croes na critica negativo. Mas aun, si bo wak bon, e maneho di Gabinete Eman ta dirigi riba creacion di un exodus den Caya Betico Croes pa asina e lugar aki perde su balor pa Oranjestad y nos Pais. Awor Minister Eman hasta kier haci uso di e Centro Deportivo Libertador Betico Croes na Santa Cruz pa pone refugiado aden. Esey ta un otro manera pa liga e nomber di Betico Croes na critica negativo den Pueblo.

Betico a sinia nos cu nos Pueblo tin balor y den union nos por logra hopi
Di tur forma Minister Eman ta purba pa kita e nomber di Betico Croes for di e memoria di e Pais aki. Hasta na school no ta brinda informacion correcto mas di kende Betico Croes tabata y kiko su legado ta pa nos Pais. Betico a sinia nos cu nos Pueblo tin balor y den union nos por logra hopi. Ta keda na nos cu sa ken Betico Croes tabata y kiko su legado ta, pa pasa e informacion aki na nos yuinan. Pesey nos mester UNI pa asina evita cu Minister Eman por keda dividi, domina y esclavisa nos Pueblo na man di debe y pobresa. Ban mustra cu NOS TIN BALOR y cu DEN UNION nos forza ta hinca pa cambia nos destino pa un bida digno di berdad.

19 september 2016

Expresionnan haci den e articulo aki no necesariamente ta refleha opinion di ArenaPoliti.co