Ora cu un Prome Minister no ta responsabel mas pa su maneho desastroso e ta purba hala di tactica fo’i sla. Si nos bay bek den historia politico di Aruba partido AVP semper a hiba un politica di segregacion. Comerciantenan den Caya Betico Croes a manifesta contra e mal proyectonan di Gabinete Mike Eman I y II, pero Sr. Eman a prefera hiba un actitud infantil y instrui su sponsornan di partido ataca ciudadanonan di pais Aruba. Ora di busca voto Sr. Eman ta brasa y baba tur hende pero ora bo sali pa bo derechonan ancra den nos constitucion Sr. Eman ta bira onsportief. No ta di awo comercio na Playa a wordo afecta barbaramente. Desde 2009 a cuminsa destrui comercio door di mal planificacion di un tram unda cu Sr. Eman a haya reconocimento na New York di su "Amigonan" miyonario pero nos pueblo a bira e victima y perde entrada den e ultimo 8 añanan cu Sr. Eman ta goberna nos pais.

Miles di famia perhudica 
Segun rapport di CFT tur compania estatal ta den rood anto esaki ta door di e mal maneho hiba den e companianan aki unda pegado di bandera ta bira Director perhudicando nos digno pueblo. Esaki tawata e caso cu Arubus y varios otro departamentonan di Gobierno. No ta awo Kamer van Koophandel a sali afo y bisa gobierno cu e tram y e parkeermeters a perhudica comercio na gran escala pero ex-Minister Otmar Oduber a sigui cu su arogancia na unda cu awe no tin crecemento economico desde 2015. No tin argumento mas pa e mal maneho aki hiba pa AVP. Nan a perhudica miles di famia di un bida digno. 

Atakenan frontal 
Ataca nos hendenan basa riba nan origen ta hopi fo’i sla. Awo Sr. Eman su sponsornan di partido ta ataca latinonan, hindunan un djis nan ta ataca otro gruponan den nos comunidad enbes di goberna na un manera responsabel y admiti su maneho desastroso stipula den TUR rapport e ultimo añanan. Nos di Movimiento Electoral di Pueblo a wordo funda na 1971 pa caba cu e mentalidad negativo aki. Nos ta kere den un solo Aruba sin distincion. Un Arubano irespecto bo origen, credo, rasa y religion. Ban p’e cambio na September venidero pa nos por salba nos pais di e decadencia total cu nos pais ta pasando aden. Vox Populi Vox Dei ! 

Expresionnan haci den e articulo aki no necesariamente ta refleha opinion di ArenaPoliti.co