Na  2015 mi a colecta mas di 1200 firma di comerciantenan y trahadornan den centro di Oranjestad. Mi a entrega un manifesto pero minister a mustra di no tin oido pa tur esnan cu a firma cu ta contra Aruparking. Di 2015 pa awo mi a saca varios comunicado, mi a bay radio y TV tambe y mi a mustra cu potret y filmacion con nos caya Betico Croes a bira un ghost town cu un potret hopi tristo di un caya den siman 15:50 pm full bashi. Despues di esey mi a saca potret di tur e tiendanan cu mester a cera nan porta nan pa via di Aruparking. Negociantenan dilanti camara a expresa nan mes bisando con malo cos ta y cu si sigui asina varios mester cera nan porta a corta plazo. Kvk a saca varios comunicado y a purba dialoga cu minister pero awe cu e mes ta Minister e no ta wak e dolor mas di e comerciantenan cu ta sufriendo.

Na 2009 minister Oduber tabata preocupa cu caya Betico Croes ta bira anochi un Ghost town y cu no tin window shopping mas y pesey tiendanan mester a muda pa sobrebibi. Awo den dia cla ariba un fin di luna nos por constata cu ta un ghost town, no tin un alma den caya Betico Croes y mas di 30 lugar ta bashi, tambe den prime location pabao pero awe si Minister no ta preocupa y no ta wak e dolor di e comerciantenan, awe Minister Oduber ta para ariba cu parkeermeter ta keda ni con dolor e consecuencia ta pa e comerciantenan.

Un parlamentario di AVP esta Donny Rasmijn tambe a hunga cu dolor di comerciantenan di caya Betico Croes. El a describi e situacion di e adicto ambulante nan den Caya Betico Croes con nan ta exigi placa pa cuida auto y cu nan ta destrui bo auto y cu nan ta ranca bo tas. Parlamentario Donny Rasmijn tambe a bisa cu tiendanan a muda pavia di e situacion ey, pues a mustra su precupacion. El a bisa cu partido AVP a protesta contra e maneho aki y ta haciendo lo maximo pa drecha e imagen di caya Betico Croes. Awe si mi no ta tende ningun parlamentario di AVP ta protesta contra e maneho aki, esta con Aruparking ta caba cu e comerciantenan te cu mas di 30 a cera nan porta den caya Betico Croes. Aruparking ta obliga bo paga pa parkeer ariba parkeerplaats cu bo mes un placa di belasting a paga pa traha. Aruparking ta mishi cu bo auto, pone un klem ariba dje y ta exigi placa pa kit’e y hera nan ta bay cu bo auto y si bo no paga bo no ta hay’e bek. Si bo wak e actonan, e diferencia ta cu Aruparking tin dashi y nan ta scondi tras di un status legal. Dicon awe ni Minister President ni Minister Oduber y ni parlamentario nan di AVP no kier duna ningun clase di oido na e dolornan di e comerciantenan cu ta sufriendo bao di e maneho destrasoso aki cu ta yama Aruparking.

Dicon awe si nan no kier mira e situacion cu caya Betico Croes ta aden cu tin mas di 30 tienda cera y hopi mas pa cera na caminda si no bin cambio pronto. Awo no ta solamente un ghost town anochi manera actual Minister Oduber tabata pretende na 2009 pero un Ghost town 24/7. Solucion a corto plaso pa caya Betico Croes pa alivia e dolor di comerciantenan ta kita parkeermeter y habri caya Betico Croes bek pa auto pasa y si kier trece cambionan positivo den futuro pa caya Betico Croes mester haci un estudio promer. Ta urgi gobierno pa pone su mes den sapato di e comerciantenan y haci e cambionan necesario pa bin fluho di hende bek den caya Betico Croes.

Expresionnan haci den e articulo aki no necesariamente ta refleha opinion di ArenaPoliti.co