Pueblo di Aruba, den e ultimo reunion di Parlamento di Aruba, fraccionnan di AVP y PDR a vota contra e mocion di desconfianza pa cu minister Paul Croes. Manera mi tabata categorisa dicho parlamento pa un nep-parlement, asina tambe nan a actua. Den tur forma di palabra.

Na prome lugar, kende a start e investigacion riba e minister? Fraccion di AVP, di MEP, di PDR of e independiente? Ningun di nan por cierto! Pues, con ta posibel cu ta net e parlamentarionan ta bay discuti cu otro, sin cu e institutonan cu a start e investigacion, no ta wordo yama? Nan no a wordo yama den Parlamento pa bin duna rason y cuenta di e hechonan liga na e acusacionnan castigabel.

Na Merca mes, Senado ta yama e director di FBI bin duna cuenta anto hasta via CNN. Na Aruba, manera un cauchi di galiña, tur ta zundra y ofende otro, lubidando e motibo di e reunion mes. E reunion no tabata tin fondo ni contenido, pa motibo manera mi a splica ariba, cu no tabata tin ningun hende presente cu ta envolvi den e investigacion. Dicon minister Dowers si ta bini cu esnan di mando policial pa duna cuenta den Parlamento? Parlamento MESTER a exigi tanto for di RST, FIOD, O.M. y Koninklijke Marechaussee, pa cada un di nan laga un di nan representantenan bin den Parlamento y testigua bao di huramento tocante e hayasgonan cu a hiba na e investigacion hudicial. Esaki no a sosode den Parlamento. 

Lo mas lamentabel ta, cu Parlamento di Aruba ta pata pata di hurista cu titulo pero cu no ta uza nan conocemento na fabor di e pueblo. Ta esnan envolvi por bisa Parlamento kico nan a encontra. Entre otro kisas droga of arma na e cas, testimonio di esnan abusa tanto físicamente como financieramente, cu a encontra placa efectivo y cuanto. Cu tabata tin transaccionnan financiero cuantioso unda cu e minister directamente ta envolvi. Cuanto caso di permiso tabata tin cu placa envolvi, etc etc.

Asina hasta Melvin Tromp lo por a haya entendimento di e asunto y como esun cu mas celebro den e fraccion di AVP, lo por a vota VOOR e mocion di desconfianza. Mi no ta papia di e investigacion. Esaki ta keda algo confidencial y andando cu no por wordo stroba.

Awor ta sigui otro pulchi pa Parlamento. Awor cu e mocion a wordo kita for di caminda, mester bin otro mocion ASAP, cu ta exigi pa minister Paul Croes reanuda su trabaonan den e gabinete Eman 2. No por ta posibel cu e ta non actief SIN cu Parlamento a dun’e autorisacion pa esaki. PM Eman no ta su hefe, sino Parlamento di Aruba. Pueblo cu a scoge Parlamento, tambe mester habri su boca y exigi pa e minister Croes reanuda su trabaonan. Lag’e sigui traha ya cu e ta wordo paga 15.000 florin pa luna.

No tabata tin motibo di desconfianza toch pa e fraccion di AVP? Pues MEP, bin cu e mocion awor pa exigi e minister pa e cuminsa traha bek! Aruba merece esaki di Parlamento di Aruba.

Expresionnan haci den e articulo aki no necesariamente ta refleha opinion di ArenaPoliti.co