STA. CRUZ – Presupuesto 2017 no ta mustra ningun senjal cu gobierno ta tumando nos situacion financiero na serio. En bes di BAHA gasto, e gobierno aki a AUMENTA su gastonan cu 63 miyon florin. Esaki ta un aumento di 5%, y pesey mester bin cu mas medida di cobra belasting na forma inhumano den 2017.

Den e presupuesto 2017 mester paga varios aventuranan financiero di e gobierno di Mike Eman, aventuranan hopi costoso.
Den 2017 mester paga 6.5 miyon florin na Green Corridor. E Green Corridor no ta cla mes ainda y ta causando hopi molester, pero ya nos mester cuminsa paga algun gasto pa e aventura cu total lo costa nos pueblo 700 miyon den 20 anja.
Den 2017 nos ta cuminsa paga e huur di e mayoria di e MFA nan, otro aventura mas. Pasobra gobierno por a inverti den mehora y expande e Bestuurskantoornan cu tabata di gobierno. En bes di bai den aventura di huur MFA. Na MFA lo mester bai paga 3.5 miyon na huur cada anja, una bes cu e MFA nan ta cla.
Den e presupuesto 2017 ainda nos ta pagando 2 miyon florin na TNO, 6 miyon den e post di  Rietveld Academie y 1.2 miyon florin na e tram. Tur esakinan tabata decisionnan equiboca di Gabinete Mike Eman cu e anja aki mester cuminsa paga, y cu lo hasi cu e MEGA DEBE cu Mike Eman a ocasiona, lo aumenta mas ainda.
No ta e aventuranan aki so ta costando pueblo caro, sino e mal gastamento di placa. Tin 325 coordinador oficialmente riba payroll di gobierno, cu ta costa 32 miyon florin e anja aki.  Y esey ta SIN conta e coordinadornan cu no ta riba payroll official, pero tin nan propio compania cu ta cobra di gobierno. Eseynan ta den e post ‘consehero’ cu ta costa 14 miyon florin. Por nota den e presupuesto tambe cu pa e anja di eleccion 2017 ta bai aumenta e post di ‘propaganda; di cada minister, 3 miyon florin. Y asina por nota varios gasto mas cu no ta realmente necesario, pero puramente pa motibo di campanja politico a wordo poni den e presupuesto.
Raad van Advies y CAFT a duna consehonan NEGATIVO riba e presupuesto aki. Ambos a bisa Gobierno cu mester cambia su presupuesto. Gobierno no a cumpli cu e compromiso hasi cu CAFT di baha su gastonan, y tampoco a cumpli cu presenta un presupuesto realistico. Tur esaki por causa hopi mas problema pa Mike Eman, aparte di e problema serio cu Mike Eman a hinca su curpa aden cu e asunto di nombramento di Gobernador nobo pa Aruba. Si gabinete Mike Eman no cambia su presupuesto, e riesgo ta un biaha mas cu Gobernador no ta firma e presupuesto. Den e problemanan serio cu Mike Eman ta aden cu Hulanda na e momentonan aki, Mike Eman lo bai riesga un otro problema?

Expresionnan haci den e articulo aki no necesariamente ta refleha opinion di ArenaPoliti.co