Partido MEP ta satisfecho cu intercambio na reunion di COPPPAL  

ORANJESTAD – Diahuebs 1 di december, un delegacion di partido MEP a asisti na e “Conferencia Permanente de Partidos Politicos De America Latina y del Caribe” (COPPPAL). E delegacion a consisti di Presidente di partido Sr. Gerrit Croes, Secretario encarga cu Relacionnan Internacional Sr. Joe Koolman, Comisiarionan di Directiva di MEP Sra. Setty Christiaans-Yarzagary y Sra. Mireille Sintjago.

Durante e encuentro aki cu diferente paisnan den Reino Hulandes conhunto cu e organisacion COPPPAL, varios problematica a bin riba mesa. Notabel tawata cu tur presente a trece dilanti nan puntonan di desacuerdo cu Hulanda. Metemento di Hulanda tabata un punto di descucion fuerte y e manera con Hulanda ta impone, tin e paisnan rabia. Tambe a wordo menciona e procedura con Gobernador a wordo elehi y e introduccion di CAFT.

Representatenan di Corsow a splica e situacion actual y a mustra con nan a perde autonomia despues di 10-10-10. A apunta algun diferencia con cierto proceduranan a bay na Aruba y na Corsow, entre otro e Status Aparte. Locual a wordo remarca tawata e hecho cu Corsow a ricibi un “schuldsanering” y cu pa Aruba esaki no tawata e caso, mientras cu pa islanan BES tambe a conoce un “gezonde start positie”.

Statia a expresa su problemanan grandi cu e ta encontra cu Hulanda, na unda hasta pagonan salarial cu ta responsabilidad di gobierno Hulandes a wordo para. Presupuesto no a wordo entrega na tempo y tabata tambe irealistico cu a haci cu Hulanda a tuma e tal decision. Statia a experencia cambio di Minister di Finansas door di Hulanda sin a wordo consulta.

E representante di “Nos Kier Boneiro Bek” (NKBB) tawata presente y a duna un splicacion basta amplio di nan actividadnan cu nan mesahe clave pa stop colonialismo Hulandes y pa stop di sigui abusa di e pueblo nativo di Boneiro. Esaki tambe despues di 10-10-10. Nan a splica tambe tocante cambio di leynan electoral unda cu awor un Hulandes por drenta Boneiro, mirando cu awor ta cu un adres local so nan mester pa drenta, pero ya despues di 3 luna nan ta ricibi derecho di voto. Nan a indica tambe cu e cantidad di Hulandesnan cu ta drentando Boneiro ta un cantidad significante y cu si sigui asina por premira cu den poco tempo e nativo lo bira minoria riba nan mesun tera. E ultimo aki tin isla di Boneiro sumamento preocupa mirando cu nan ta core e risico di perde nan identidad.

Representantenan di NKBB a haci un peticion di sosten na Aruba, na demas islanan y na COPPPAL pa asina nan por yega Nacionnan Uni y ventila nan problemanan. Nos di MEP a mustra solidaridad y sosten den nan causa.

Pa loke ta e punto di agenda, status politico di Aruba, aña pasa den asamblea general di COPPPAL na Sto. Domingo lider di MEP Sra. Evelyn Wever-Croes a haci un presentacion den cual el a pidi COPPPAL sostene Aruba den e lucha pa recobra su autonomia. Tur e puntonan aki a wordu treci dilanti den su totalidad durante e conferencia recien na Boneiro.

Den un reunion bastante intensivo, a resalta claramente e necesidad pa hunto cu COPPPAL yega na Nacionnan Uni pa denuncia e manera con Hulanda ta tratando paisnan mustrando su poder y lubidando e Statuut firma cu Nacionnan Uni na unda e ta mara pa cumpli cu cierto acuerdonan.

Manolo Pichardo, presidente nobo di COPPPAL a recomenda Aruba, Corsow y Boneiro pa uni pa asina hunto cana e caminda pa yega na Nacionnan Uni. Formando un bloke lo por tin mas significacion mirando cu hunto por demostra mas forsa cu si cada haci esfuerso separa. Nos a ricibi conseho y sosten di COPPPAL den esaki y sigur pa pone presion politico internacional riba Hulanda via Nacionnan Uni.

Na final di e reunion a procede pa traha riba un lista di resolucion, na unda Aruba a inclui un breve historia di su experencia. Un peticion pa sosten na nos tur a wordo entrega na COPPPAL como un garantia cu e lista di resolucion lo wordo procesa y cumpli.

Tabata un reunion hopi fructifero unda nos a comparti y a ricibi hopi informacion valioso. Na final por bisa cu nos a sali masha satisfecho y contento cu e resultado di e reunion pero tambe cu e resolucion cu a wordo presenta. 

Expresionnan haci den e articulo aki no necesariamente ta refleha opinion di ArenaPoliti.co