'Maiden speech' di Minister Arends na evento di ATIA a acapara atencion.

ORANJESTAD- Minister di Asuntonan Economico y Comunicacion, Sr. Richard Arends, a tene su prome discurso oficial na e evento di ATIA dilanti Gobernador di Aruba, Vice-Presidente di Parlamento, colega ministernan ademas di un sala yen di invitado. Reapertura di e refineria tabata e tema di e anochi aki. Otro invitadonan cu a hiba palabra riba e topico actual aki ta srs. Alvin Koolman y Alirio Zambrano. Minister Arends a bisa di ta sinti su mes honra di ta orador di parti di gobierno. Prome cu el a keda huramenta como minister, Richard Arends tabata traha pa tanto Minister de Meza como Prome Minister Eman y den nomber di gobierno a lidera e team negociador pa loke ta reapertura di e refineria cu awor a bira propiedad di pueblo di Aruba. Su rol tabata evidente y e resultado exitoso.

Minister Arends tabatin palabranan di elogio pa sr. Koolman y sr. Zambrano, cu kendenan el a traha hopi di cerca y a cera conoci cu nan profesionalismo, nan compromiso cu e reto nan dilanti y e promesa cu Citgo lo ta un bon ciudadano corporativo den nos comunidad.

Arends a bisa su audiencia cu e kier comparti cu e sala algun pensamento cu e ta spera di por informa y podise inspira esnan presente den e retonan comercial den e futuro cercano. "Nos tin un aña hopi prometedor nos dilanti, yena cu oportunidadnan. Reapertura di e refineria sin duda lo inicia hopi actividad den varios sector. Nos ta anticipando un crecemento economico di 3.4% na 2017 y un reduccion di desempleo cu ta yega te 5%."

Riba tereno fiscal, Arends a splica, pa prome biaha Aruba ta para na vispera di un presupuesto ekilibra anticipando un surplus na 2018. Esaki ta pone cu e debe nacional ta sigui baha disminuyendo asina e debe na e proporcion di GDP.

"E perspectiva pa futuro ta na nos bentaha", Minister Arends a splica. El a hiba e audiencia riba un recorido di e tur e areanan di nos isla cu ta den pleno desaroyo. Inversionan manera Green Corridor, Watty Vos Boulevard, renobacion y ampliacion di nos hospital, waf di Barcadera, desaroyo turistico y cultural di San Nicolas ta brinda un sin fin di oportunidadnan pa comerciantenan chikito y mediano, como tambe otro industrianan di nos economia. “ Tur e areanan rond di e refineria pa prome bes den historia  di e industria aki ta bira e catalisador pa actividadnan paralelo. "Gobierno ta dispuesto pa duna un man y facilita".

Expresionnan haci den e articulo aki no necesariamente ta refleha opinion di ArenaPoliti.co