DISCURSO LIDER DI MEP NA CELEBRACION DI FIN DI ANJA.   

2016 ta un aña den cual nos a celebra 45 aña di existencia di nos partido. Nos a tene varios momento di celebracion sumamente especial y exitoso. Nos a cuminsa cu e celebracion grandi di 17 y 18 di maart, cu un EXPO di 45 aña MEP. E dia ey tambe nos a duna homenage na esnan cu tabata instrumental den logra nos himno y nos bandera 40 aña pasa. Nos a tene un gran celebracion dia 18 di maart henter dia na nos Cede. Fin di april nos a tene otro celebracion riba Dia di Rey y nos a enfoca riba nos muchanan. Na oktober nos a celebra e 45 anja di existencia di nos parti na grandi aki na nos Cede cu bandanan popular. Na November nos a rindi homenage tambe na tur candidato y ex candidato di MEP. Aña 2016 tabata un aña den hopi sentido dificil pa hopi hende, sinembargo nos ta drenta 2017 cu optimismo. Pa nos di MEP aña 2017 ta un aña crucial, e ta e aña di eleccion, e aña di victoria.

E ta e aña cu nos ta bai trese bek orden y respet, y siguridad combatiendo criminalidad.
Nos ta bai trese bek cuido digno di salud, pa un y tur especialmente pa nos grandinan. E aña cu nos ta bai trese bek proteccion pa nos muchanan, den tur sentido, y garantia pa ensenjansa di nivel. Pa nos hobennan ademas, oportunidad di empleo. Nos lo bai fortifica nos nucleo familiar, y pone nos ser humano central y asina trese prosperidad y bienestar pa Aruba.

E 9 lunanan nos dilanti lo ta crucial. Nos tin nos plan y programa di campaña prepara caba. Material di campaña tambe ta na caminda, tur cos ta cla pa asina cu anja bolter nos presenta nos campanja 2017, nos candidatonan nobo, y nos solucionnan y speransa pa un bon gobernacion, cu ta trese bienestar pa un y tur. Y esey ta e speransa cu nos kier duna cada un di boso awe.

Nos sa cu e trabou ta duro, pero nos no tin miedo. Encuestanan ta mustrando hopi na nos fabor, cu nos partido ta cresiendo y cu nos oponente ta perdiendo sosten. Pero asina mes, nos no ta confia. Cada un di nos candidatonan di MEP ta determina y comprometi pa duna e maximo di nos mes pa nos trese nos mensahe tur caminda riba nos pais. Nos mensahe di speransa mescos despues di cada tempestad, cu solo ta bai sali atrobe. E mensahe pa hasi nos pais sigur bek pa nos y nos yiunan por biba aden; nos lo intensifica control riba nos fronteranan y nos lo pone orden den cas. E mensahe di un mihor cuido di salud tresiendo e cuido mas serca di e patient, cuminsando cu un centro medico den e area di Santa Cruz y Paradera. Nos lo percura cu bo no mester warda lunas pa haya cita cu specialista of hasi un echo na hospital. Y nos lo percura pa dokternan yiunan di tera cu a studia den regio por traha aki na Aruba. Ensenjansa lo haya e atencion, pa nos trese inovacion den ensenjansa, pa nos muchanan haya les mas cu computer y formanan digital y nos ta percura pa Noord haya su scol HAVO/VWO. Nos lo baha costo di bida, elimina e medianan inhusto cu a wordo cometi contra nos pueblo, baha e edad di pensioen bek y pa nos pensionadonan nos ta elimina belasting riba pensioen di biehes dunando nos pensionadonan un alivio. Y asina tin hopi mas compromiso cu poco poco nos lo trese nan padilanti.

Mi kier gradisi cada votador, simpatisador di partido, lidernan di bario, presidentenan di directiva, miembronan di directiva y candidatonan di MEP hunto cu nan famia pa e sosten y lealtad na nos partido. Cu UNION nos pueblo a logra cosnan grandi, y cu UNION den nos partido, nos lo logra cosnan grandi pa MEP y pa Aruba. Y mi ta pidi boso, yuda nos pa e UNION bira mas firme, pa asina MEP por sali victorioso den 2017.

Cu e anja nobo por trese hopi paz, harmonia y felicidad pa cada un di boso, y pa Aruba, cu e anja nobo trese e CAMBIO tan anhela pa un mihor ARUBA, un ARUBA di bienestar y progreso pa tur. Biba Aruba, Biba MEP y un Felis aña nobo. 

Expresionnan haci den e articulo aki no necesariamente ta refleha opinion di ArenaPoliti.co