Karel Maduro (MEP): Otro mas cu ta halucina manera un hende cu ta huma piedra
![KarelMaduro02](/images/2016-press/KarelMaduro02.jpg)
Pueblo di Aruba, con hopi abo como ser humano por permiti un gobernante berde keda ofende bo inteligencia? Den e caso aki mi ta referi na declaracionnan di Parlamentario Herde. Manera un hende cu ta halucina, cu ta mira pitufo, ta expresa cu e aña 2016 tabata uno cu prosperidad. Riba tereno di economia, finansa publico, seguridad social, labor, infrastructura y enseñanza. Un economia cu a crece cu 0.01% segun Centrale Bank di Aruba. Raad van Advies y CAFT ta menciona cu e crecemento economico ta bay ta negativo pa 2016. Finansa publico cu a wordo malversa di tal manera cu Aruba ta bao di curatela indicando cu gobierno di Aruba ta un gobierno choller financiero. Seguridad na Aruba ta solamente den percepcion di e propio minister di husticia. Ni cuanto criminalidad sosode, tanten cu esaki NO ta concerni un ser keri di e minister di husticia, e NO ta worry. Su declaracionnan ta cu otro parti di mundo criminalidad ta mucho mas halto! Pedofilia ta na moda na Aruba sin cu e fraccion di AVP den Parlamento ta haci lo suficiente contra esaki. Solamente pa ley di cacho y saco di plastiek nan ta haya otro unanimamente. Labor, cuanto hende na Aruba ta sin trabao? Consecuentemente, cuanto cas na Aruba ta sin coriente y of sin awa door cu e habitantenan ta SIN trabao? Infrastructura a wordo financia door di Hulanda cu sr. Herde ta gaba di esaki? Absolutamente cu NO! Mas bien Hulanda via e curator (CAFT) riba e gobierno di AVP a declara pa no sigui cu mas proyecto di PPP. Tambe sr. Herde no ta bisa pueblo cuanto placa tin mester pa paga e proyectonan di infrastructura. Kico ta bay ta e medidanan pa recobra placa for di e pueblo di Aruba pa cubri e proyectonan di infrastructura? Pa 2016 e suma tabata 65 miyon y pa 2017 esaki ta bai ta 97 miyon florin. E sumanan ta tanto pa e Green Corridor y e ainda pa traha Watty Vos Blvrd. Tambe e 97 miyon ta bay ta pa alrededor di 18 aña largo y sin ningun garantia. Solamente ta e pueblo ta para garantia atrobe, manera ta e malicia di partido AVP pa haci cu e pueblo. Enseñanza ta cay bao di un minister cu e mes NO ta kere den e enseñanza di pais Aruba. Su propio yiunan ta bay International School na Aruba. Ta su escogencia y derecho, pero e ta mustra mescos cu un bendedor di cerbes cu ta bebe publicamente otro marca di cerbes cu e mes ta bende. Pues e mes no ta kere aden. Consecuencia ta cu e minister NO ta worry mes con enseñanza ta desaroyando na Aruba. Na EPI sector Tecnico, examen klas di Natuurkunde no tin material pa haci e les di practica. Aki EPI ta djis laga e parti aki cay afo perhudicando e alumno. E minister no sa mes y si e sa, e no ta worry tampoco. Anto sr. Herde ta gaba cu AVP su maneho den 2016? Sr. Herde ta parce hende cu di berdad ta huma piedra. E mentiranan di sr. Herde ta un prueba palpabel, demostrando con AVP ta mira y ta trata e pueblo di Aruba. AVP ta keda insisti cu e pueblo di Aruba ta un pueblo di hendenan cara patras door di keda ofende e pueblo su inteligencia. E slogan di Pueblo di Aruba pa 2017 ta “AVP nunca mas te den siglo di siglonan”.
Expresionnan haci den e articulo aki no necesariamente ta refleha opinion di ArenaPoliti.co