Otro siman ta e siman unda nos ta recorda y celebra e fecha natalicio di nos Libertador Betico Croes. Esaki ta e momento cu nos mester wak bek e trayectorio y e lucha di un homber, tata, ruman y amigo cu a sa di lucha sacrificando su propio bida y amor pa su famia p’asina logra e libertad cu nos pueblo a anhela.  Awe nos por bati riba nos pecho cu orguyo cu Dios a manda pa nos un berdadero luchador pa nos ciudadanonan y cu awe nos por goza di nos libertad. 

Nos hobennan 
Ami ta tuma e oportunidad pa toca e tema aki cu nos hobennan cu grandemente ta esnan cu ta dicidi riba futuro di nos pais. Nos hobennan ta nos futuro generacion y manera Betico a bisa den un di su discursonan, cu si mi cay na caminda tuma e bandera y sigui cu e lucha y esaki ta nifica cu hamas nos mester laga e guera un banda pa lucha pa nos libertad y nos lo sigui defende loke ta di nos. 
Den un otro comunicado mi lo trece mas na e atencion di nos hobennan. 

Deseo y lucha di nos Libertador
Nos Libertador desde cu el a tuma e decision di lanta su propio partido tabata tin un solo meta y cual tabata pa trece unificacion den e pueblo di Aruba, pa hunto nos lucha pa nos libertad y pa cual ningun otro politico tabata tin esaki den nan pensamento corda den nan curason. Betico, un tata no solamente pa su yiunan pero un tata di henter un pueblo cu a sa di cana di Wespunt te na Cero Colorado drentando comunidad sin ningun temor pero cu ansha y deseo pa logra loke e pueblo tabata anhela. El a lucha contra politiconan di otro islanan y tambe esnan di Hulanda pero cu e voz di e pueblo den su oido, su mente y su curason a logra su lucha pa cada un di nos cu ta biba riba e pida baranca aki. 

Betico a logra e deseo di pueblo
Danki na e lucha di Betico cu si a drenta y cana manera menciona cu un curason humilde pero fuerte pa lucha y scucha cada ser humano  den e pais aki, nan anhelo, nan grito den silencio pa nos libertad. Cu lagrimanan na wowo, te hasta cu sclamacion e pueblo di Aruba a sa di duna nos Libertador Betico Croes e mandato pa bringa pa nos libertad di cual Betico como un tata, como un ciudadano balente a tuma e rienda y hiba e mensahe fuertemente pa Hulanda compronde cu Aruba tabata kier su libertad. Momento cu Hulanda no kier a scucha e bos di nos ciudadanonan, Betico a  uni su mes cu tur nacion rond di mundo y a logra pa fortalece e lucha pa su pueblo y ta logra esaki aunke nunca Betico mes no a gosa di su lucha.

Pero unda cu Betico ta, den Reino di nos Señor, Betico ta cu nos y su anhelo y gritonan den e cuatro bientonan semper lo keda nos fortalesa di sigui cu e lucha manera e mes a suplica, pa si mi cay na caminda, gara e bandera y sigui cu e lucha. Nunca laga e guera un banda y sigui lucha pa nos libertad y si cualkier hende trata di mete cu nos libertad esey ta nifica guera.

Cu gran honor mi ta pidi henter pueblo di Aruba pa corda hisa nos bandera cu Betico a lucha pe y a duna nos pueblo. Ban duna honor na un berdadero Libertador y pa semper e keda e tata di nos pueblo. Cu e bon Dios bendiciona nos dushi pueblo di Aruba y tur nos ciudadanonan, cu semper a keda defende nos pais cu Gilberto Francois Betico Croes a laga pa nos. Biba Betico, Biba nos Libertador.

Expresionnan haci den e articulo aki no necesariamente ta refleha opinion di ArenaPoliti.co