Inversion di 280 miljon florin pa drecha/renova  scolnan riba nos Isla !!  Un suma gigantesco !! Di con esaki a crece na e suma gigantesco aki ?  Pasobra anjas largo gobierno no tabata invertiendo suficiente den Ensenansa y consecuentemente suficiente den mantencion/renovacion di nos scolnan ! Y esaki ainda no ta ensera moderniza nos scolnan segun criterio modern.  Esaki ta demonstra tambe cu klinkers a ricibi hopi mas prioridad cerca e actual gobierno cu  ensenansa di nos hubentud ! 

Pa hopi anja PPA tabata e unico partido politico cu tabata splica e necesidad pa gobierno inverti minimalmente  segun e  norma di UNESCO den Ensenansa esta minimalmente 6 %. PPA ta e unico partido cu tabata mira necesidad pa hasi esaki 6.5 % pa asina duna Ensenansa un suma cu forza retroactivo pa asina crea un espacio pa mejora e necesidadnan den Ensenansa. 

Lamentablemente  e signatura di tanto AVP como MEP pa casi 30 anja no a sinti necesidad pa cumpli cu e norma di UNESCO y pa hopi anja esaki tabata entre 4 % pa 5% cual tabata larga Ensenansa cu un necesidad enorme  atras  cu pa anjas no tabata ricibi atencion. Sin cu nos ta na altura di e ultimo dos/tres anja encuestion e ultimo vez cu Aruba a cumpli cu e 6 % di nos Entrada Nacional na Ensenansa tabata na anja 1986 despues di esaki ningun pero ningun gobierno ni Geel ni Berde  pa casi 30 anja no a cumpli cu e inversion  necesario den Ensenansa. Manera PPA a jega di splica cu nos a jega di hasi un analis riba diez anja di parcialmente AVP y parcialmente MEP y nos a conclui cu ensenansa a perde di ricibi den e periodo ey un 700 million florin.

Cu otro palabra  un lista pa inverti den Ensenansa di 280 miljon florin na renovacion di nos scolnan ta solamente e ‘cabez’ di e seroe di ijs pa locual ta e  necesidad di Ensenansa den nos sociedad. Ensenansa mester ta e prioridad number uno di e proximo gobernacion di nos pais !! Pa colmo ora nos ta consciente di e cantidad di  kamber di hotel cu e actual gobierno tin pendiente pa worde construi esey lo bai aumenta e necesidad di ensenansa den nos  sociedad. Pesey PPA ta kere fielmente den un gobierno na unda ensenansa pa e periodo aki no mester ta man di e partido majoritario di cualkier coalicion. Despues di 30 anja ensenansa mester ta den man di  otro cu por exigi mas atencion pa Ensenansa como prioridad number 1 di nos pais.

E ‘cabez di e serioe di ijs ta demonstra na mes momento cu e prioridad  di varios signatura y sigur signature Mike  Eman e asina jama ‘green government’ tabata totalmente robez. No por tin tanto inversion den infra-structura, tanto inversion den ‘klinkers’  pero un falta asina enorme den nos Ensenansa ! Majornan pensa esaki seriamente.

Cu gran orguyo durante e tratamento di presupuesto nos flamante ministro di Ensenansa  sra Hooyboer a splica cu su ministerio ta ensera 20 % di e totalidad financiero di presupuesto di nos pais. PPA a contestele di pafor di parlamento cu inversion den ensenansa no ta worde evalua riba porcentaje di un presupuesto pero riba e criterio internacional di UNESCO cu ta 6% di nos entrada nacional. Y PPA ta di opinion cu entodo caso e inversion den ensenansa mester ta na 6.5%.

Segun ministro di ensenansa sra Hooyboer actualmente gobierno ta inverti 27 miljon florin den mantencion di nos scolnan…pero resultado di e necesidad den Ensenansa esta 280 miljon florin esta diez vez e inversion annual ta demonstra con hopi nos estudiantenan lo mester warda pa nan scol ricibi e atencion y mantencion necesario. E inversion di 27 miljon annual lo mester aumenta minimalmente pa 50 miljon florin annual. Y aki no ta trata modernisacion di nos scolnan ainda !!

RE-STRUCTURACION DI NOS PRESUPUESTO !

Pesey PPA ta boga pa un re structuracion di e forma cu gobierno ta traja su presupuesto !  Un re-structuracion cu algun prioridad bon fiha.  Ensenansa prioridad no. 1 sigui pa nos Cuerpo di Polis …riba e instancianan aki lo mester tin mas inversion y ningun cortamento di gasto. No kabe duda cu lo mester tin un rebaho di gasto pa tur departamento/bureau cu no ricibi e  stempel di prioridad ….nan tur lo mester pasa den un re-structuracion di nan presupuesto cual lo mester baha !!

E lista largo di 280 miljon florin ta demonstra un vez mas tambe cu nunca gobierno di AVP mester a jega na un final di e ajudo economico hulandesden anja (2000)  anto sin participacion di e gremio importante den nos comunidad cual majoria di nan projecto tabata worde construi cu ajudo economico hulandes. Un eror historico riba nomber di gobernacion di AVP mientras cu MEP a sinta den oposicion y a permiti esaki tuma lugar e tempo ey. E unico voz  cu a defende necesidad di pueblo  y necesidad pa mantene ajudo economico hulandes tabata partido PPA.

Cu tin necesidad pa crea un fondo pa ajudo den mantencion di nos scolnan ta sigur !!  Den un otro articulo PPA lo dedica mas atencion na e aspecto importante aki y sigur mira den e luz di un 40/50 mil habitante extra cu maneho di AVP lo bai occasiona y larga atras pa e sigiente gobierno atende cu esaki. Un vez mas pesey PPA ta convenci cu pueblo di Aruba mester ta consciente cu AVP su tempo den gobernacion a jega y mester worde finalisa e anja aki ! Na mes momento pueblo mester crea necesidad di un coalicion cu lo mester consisti di varios partido politico pa asina un por controla otro !!  Pero den mas articulo PPA lo duna mas informacion riba e pensamento aki. PPA ta dispuesto pa goberna nos pais segun principio di bon gobernacion y un presupuesto  re-structura cu prioridad adapta segun necesidad real di nos pueblo. Y pa PPA  ‘Ensenansa ta prioridad number Uno’.


Aruba, 19 di januari 2017.
Lider Politico di PPA 
BENNY NISBET

Expresionnan haci den e articulo aki no necesariamente ta refleha opinion di ArenaPoliti.co