Resumen di e Relato Mensual di Juni 2017 

Desaroyo monetario 
Den e luna di Juni 2017, e cantidad di placa den circulacion a aumenta cu Afl. 56,3 miyon te na Afl. 4.134,2 miyon, compara cu Mei 2017. Esaki a resulta door di un expansion den e activo domestico netto (+Afl. 78,5 miyon) y un bahada den e reserve di divisa netto (-Afl. 22,2 miyon).

E aumento den e activo domestico netto a surgi for di subidanan den tanto transaccionnan no relata na credito (+Afl. 45,9 miyon) como credito domestico (+Afl. 32,6 miyon). E crecemento den transaccionnan no relata na credito a wordo causa principalmente door di subidanan den e asina jama “shareholders’ equity”, otro debenan y transaccionan di clearing. Credito domestico a expande door di mas credito bancario netto na e sector publico (+Afl. 25,3 miyon) y mas credito bancario na e sector priva (+Afl. 7,2 miyon).

E expansion den credito bancario netto na e sector publico a surgi primordialmente door di un bahada den e depositonan di gobierno (-Afl. 20,6 miyon). Credito bancario na e sector priva a subi principalmenta door di mas hipoteca pa vivienda (+Afl. 7 miyon) y credito na consumidor (+Afl. 4 miyon). Di otro banda, credito na empresa a baha cu Afl. 3,8 miyon.

E bahada den e reserva di divisa netto di e sector bancario (-Afl. 22,2 miyon) ta debi na benta netto di divisa na publico (-Afl. 184,1 miyon), principalmente relaciona cu importacion di mercancia, transferencia netto pa cuentanan den exterior di companianan local, otro servicionan y transferencia coriente. Esaki a wordo mitiga pa un gran parti pa compra netto di divisa for di publico (+Afl. 161,9 miyon), primordialmente relaciona cu entrada for di turismo, inversion directo y servicio di transportacion.

Inflacion 
E nivel general di prijs, cu ta wordo midi door di e indice di prijs di consumo, a registra un bahada di 0,6 porciento den e luna di Juni 2017, compara cu Juni 2016. E contribuyente principal na e caida aki ta e componente “Vivienda”, cual ta debi primordialmente na un reduccion den prijs di electricidad. Di otro banda, e componentenan “Cuminda y Bebida No-Alcoholico”, “Transporte”, “Educacion”  y “Restaurant y Hotel” a registra un subida. Si exclui e componentenan di cuminda y energia for di e indice di prijs di consumo, inflacion ta mustra un crecemento di 0,4 porciento compara cu Juni 2016. Pa loke ta trata e promedio anual di e tasa di inflacion, esaki a keda mescos, esta un bahada di 0,4 porciento na Juni 2017, compara cu Mei 2017.

Turismo
Na Juni 2017, e cantidad di turista a registra 85.288 bishitante, cual ta 1.409 bishitante (-1,6 porciento)  menos cu na Juni 2016. Esaki a resulta principalmente door di un reduccion di 22,4 porciento (-4.615 bishitante) den turista for di e mercado Latino Americano. Di otro banda, e mercado Norte Americano a registra un subida di 6,3 porciento (+3.531 bishitante).

E caida den e mercado Latino Americano a wordo causa primordialmente pa menos bishitante for di Venezuela (-5.417 bishitante of -44,9 porciento). E crecemento den e mercado Norte Americano a resulta mas tanto for di un aumento den bishitante for di Merca (+3.377 bishitante of 6,2 porciento).

E cantidad di turista crucero a registra un subida di 13.785 of 54,2 porciento te na 39.237 bishitante na Juni 2017, compara cu Juni 2016. E cantidad di barconan a expande for di 7 na Juni 2016 pa 13 na Juni 2017.

Entrada di Gobierno 
Na Juni 2017, entrada di gobierno a suma Afl. 103,4 miyon, cual ta Afl. 19,2 miyon mas compara cu e mesun luna di e aña anterior. E subida aki a resulta principalmente for di un aumento den entrada no relata na impuesto (+Afl. 18,1 miyon). Tambe, entreda di impuesto a crece marginalmente  (+Afl. 1 miyon).

E expansion den entrada di impuesto ta relata principalmente na subidanan den accijns riba cerbes (+Afl. 3,3 miyon), entrada di benta di negoshi (B.B.O.) (+Afl. 2,2 miyon), e asina yama “overdrachtsbelasting” (+Afl. 1,5 miyon) y impuesto riba entrada (+Afl. 1,1 miyon). Di otro banda, bahadanan a wordo registra den entrada di impuesto  riba ganashi (-Afl. 1,8 miyon) y accijns riba tabaco (-Afl. 1,6 miyon).

Banco Central di Aruba 
15 September 2017

Expresionnan haci den e articulo aki no necesariamente ta refleha opinion di ArenaPoliti.co