“Clausura campaña electoral, a bo sa pa ken bo ta vota?” 

Sr. Bakmeyer ta cuminsa bisando cu awor cu nos ta jegando na final di e campaña electoral 2017, ta un bon momento pa refleha riba mi mesun campaña, loke mi ta para pe y loke mi kier logra si mi haña bo voto di confiansa ariba dia 22 di september. 

PREVENCION & NOS SALUD, NOS MUCHANAN & NOS HOBENNAN, NOS GRANDINAN 
E motibo principal pa cual mi a dicidi di drenta den politica ta pa hasi un diferencia berdadero y lucha pa un mihor futuro pa mi yiunan, bo yiunan, nos yiunan. Tambe mi kier traha riba prevencion, pa nos tur por disfruta di un mihor salud y mi kier zorg pa nos grandinan tin e cuido y calidad di bida cu nan merece. Drentando den e hogarnan aki na Aruba y papiando habiertamente cu nos hendenan, mi por a ripara cu esakinan enberdad ta topiconan cu ta jega na nan curazon tambe y cual tin nan preocupacion. Esaki a dunami aun mas motivacion pa bai traha den parlamento na bienestar di un y tur, segun Sr. Bakmeyer. 

Nos mester traha hopi mas na prevencion di malesanan, especialmente sobre peso y obesidad y malesanan chronico manera por ehempel diabetes. Esaki nos mester enfoka riba dje pa evita cu nos mester cuido medico, pa baha gastonan di AZV y primordialmente pa nos tin un mihor calidad di bida. Nos mester hasi cuminda saludabel y un estilo di bida saludabel, mas accesibel y pagabel pa nos hendenan. Mi a elabora extensamente riba e topiconan aki den mi articulonan y esakinan ta un parti clave tambe den e plan di gobernacion cu POR tin ariba mesa. 

Tambe nos mester drecha e parti social na Aruba drasticamente, sigurando cu nos muchanan y hobennan ta haña e educacion, guia y sosten necesario y adecua, pa nan por bira miembronan exitoso di nos sociedad, cu ta contribui debidamente na nos isla. Esaki lo preveni dropouts, criminalidad, desempleo y hopi mas problemanan social cu nos ta confrontando awor. Tambe mayornan y adultonan mester wordo re-introduci na nos norma- y valornan, pa nan por ta un mihor ehempel pa nos futuro generacionnan. Riba esaki tambe mi a duna mi vision y plannan, cual ta wordo comparti door di POR y cual nos lo enfoka riba dje den e proximo gobernacion. 

Por ultimo nos no tin cu lubida nos grandinan, Sr. Bakmeyer ta bisa. Nos mester bai duna nan hopi mas atencion. Nan merece un mihor cuido y un mihor calidad di bida, cual ta ensera tambe un dokter specialmente pa hende grandi. Tambe nos mester bai duna atencion nan esnan cu ta cuida nan sernan keri na cas mes, pa nan tin e sosten y guia necesario pa por sigui hasi e trabao voluntario aki. Tur esaki  ta rekeri implementacion di ideanan nobo y innovativo, cual mi a presenta tambe den mi diferente articulonan. Ami conhuntamente cu partido POR ta cla pa traha riba e puntonan aki.

ABO SA PA KEN BO TA VOTA? 
Mi speransa ta cu tur hende aki na Aruba cu tin derecho di voto, lo hasi uso di esaki dia 22 di September y cu nan lo hasi esaki conscientemente y basa riba un evaluacion cauteloso di e persona y partido cu nan ta vota pe. Si despues di a hasi e evaluacion aki, bo deposita bo vota den mi persona, mi por asegurabo cu mi lo traha incansablemente pa nos pais y pa cada un persona cu ta biba akinan. Mi ta conta riba bo sosten, Hunto Nos POR!

Expresionnan haci den e articulo aki no necesariamente ta refleha opinion di ArenaPoliti.co