Dialuna ultimo un grupo di studiante y mayornan di scol primario Kudawecha a manifesta dilanti di Parlamento. Muchanan balente, prepara cu nan bordji, cu kier nan juffrouw bek. Nan a entrega cartanan na Presidente di Parlamento Marisol Lopez-Tromp y lider di oposicion Evelyn Wever-Croes. Nan peticion ta pa yama un reunion pa atende Gobierno riba e problema serio cu ta wordo causa na e scol, despues cu a schors juffrouw Suki. Presidente di Parlamento a duna e mayornan e seguridad cu e ta bai atende cu e reunion aki e siman aki mes.

SCHORSING
Studiantenan a entrega tambe un copia di e carta cu e juffrouw a haya pa su schorsing. E carta aki a cai manera un sorpresa pasobra e minister a bisa cu e juffrouw NO ta suspendi, y awor ta resulta cu desde 20 maart e ta suspendi. E carta ta sigi bisa cu e juffrouw ta suspendi despues di investigacion hasi, y despues cu a conclui cu e juffrouw no por traha mas como juffrouw y tin cu sigi tratamento medico. Minister ta bisa cu e juffrouw NO ta suspendi, y cu ta awor numa e ta hasiendo un investigacion, cu lo ta cla otro siman. “E tipo di discrepancianan den e diferente declaracionnan ey ta e problema. Un cos mi por bisa, e minister su caso ta completamente perdi, pasobra el’a comete erornan tecnico, y esey ta pone su caso cai na awa. E juffrouw tambe a perde hopi den e proceso aki, pero esunnan realmente perhudica ta e studiantenan, y esey mi kier pa minister Michelle Hooijboer-Winklaar compronde. E asunto aki no ta cuestion di ‘ego’, aki ta e interes di e muchanan mester ta na prome lugar. Admiti bo eror, y ban ‘move on’. E muchanan no por warda mas!”, Evelyn Wever-Croes a duna di conose.

REUNION DEN PARLAMENTO
“Nos ta hopi preocupa pa locual ta pasando na e scol, especialmente cu klas 6B. Nos ta purbando desde siman pasa pa haya Minister Michelle Hooijboer-Winklaar den Parlamento pa atende cu entre otro e caso aki, pero tambe e caso di aumento di schoolgeld di SKOA, pero e Minister no ta duna oido na Parlamento. Locual tin ami mes preocupa ta e bienestar di e studiantenan, especialmente esnan cu otro luna mester pasa e Colegio toets, pasobra si e studiante no sinti’e comfortabel, si e tin e preocupacionnan aki pa cu su juffrouw, e por traha e toets aki malo, y e esey lo tin un impacto riba su bida pa semper cu ningun hende por recupera. Como mama, mi por imaginami e sentimento di frustracion y rabia serca e mayornan. E forma con minister a atende cu e caso aki ta completamente fout, y ta obvio cu su so no por sali afo. Pesey Parlamento mester asumi su responsabilidad den e caso aki”, segun lider di MEP, Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co