Den e caso reciente di scol di Kudawecha minister Michelle Hooijboer a wordo yama den Parlamento dia 1 di april ultimo. Esaki despues cu e minister a suspende un maestra, despues di un supuesto keho a wordo hasi y un supuesto investigacion cu e minister mes a laga hasi, pero cu te dia di awe e no kier a comparti cu ningun hende. Nunca antes, den e 5 anjanan di mi carera politico mi a mira un Minister wordo cuestiona di es forma aki pa tur parlamentario presente, algun mas cu otro. Pero TUR parlamentario SIN EXCEPCION a expresa nan desaprobacion pa e forma con e Minister a atende cu e asunto di scol di Kudawecha.

E mesun Minister Michelle Hooijboer Winklaar ta paga un compania di mercadeo renombra na Aruba 8 mil florin pa luna, pa scapa su cara. Pero den e caso di e scol di Kudawecha e compania aki a faya y nada mas por scapa cara di e Minister.

Pues e ora no ta keda e Minister, hunto cu su compania di mercadeo, nada otro cu lastra hendenan drechi, pa asina tur demas persona envolvi wordo mira mas malo cu e Minister mes a keda mira. Y den esaki e compania di mercadeo aki cu ta gana 8 mil florin pa luna no ta keda sin usa ningun recurso, ni con sushi y baho e ta. Entre otro ataca hende riba facebook, skibi palabra malo riba facebook, yama hende pa porco. etc. 

Durante conferencia di prensa di MEP diaranson 22 april, un periodista liga na e compania di mercadeo aki a hasimi e pregunta cu si e grabacion ilegal cu a wordo hasi di e maestra en cuestion sali, con esey lo afecta nos posicion. Y mi a contesta e periodista cu mi no ta kere cu e grabacion ta asina malo, pasobra sino e compania di mercadeo, cu SI a scucha e grabacion (al menos esey nan a skibi riba facebook), lo a publica e grabacion dia biew. Pasobra bo ta kere cu si e compania ta wordo paga 8 mil florin pa luna pa scapa e cara di e Minister, anto e tin un prueba asina fuerte cu por scapa e Minister, e lo no use? E simple hecho cu e no a hasi’e ta mustra cu sea no tin grabacion, of sea e grabacion no ta yuda e Minister.

Aparentemente e contesta aki no a cai na agrado di e periodista, pasobra riba su website di noticia el'a saca su gal contra mi persona, contra mi famia, y loke ta mas tristo, contra e maestra en cuestion, sin hustificacion.

Na mi humilde opinion, e compania di mercadeo cu ta cobra 8 mil florin pa luna di placa di pueblo pa scapa cara di e Minister a faya, pasobra nan ta pone e Minister mustra WRONG AND STRONG. Y no puntra MEP, puntra AVP mes. Puntra sra. Marisol Lopez-Tromp (AVP) y e mes por splica kiko e ta pensa di e procedura cu a wordo encamina den e caso aki.

Libertad di expresion ta un derecho sagrado. Libertad di prensa ta basa riba e libertad di expresion. Sinembargo si prensa ta malusa su derecho pa lastra hende drechi, prensa mes ta hunga cu e derecho sagrado ey. Ta momento pa nos asumi nos responsabilidad. Mi responsabilidad como politico ta pa scucha dolornan den comunidad, y representa nos pueblo den Parlamento. Y si mester, mi mester lanta y para abuso contra esnan cu no por para pa nan mes. Esey pueblo ta spera di TUR politico. Esey mi a hasi tambe den e caso di Scol di Kudawecha, mescos cu demas parlamentarionan di MEP, AVP y di PDR. Ami ta carga mi responsabilidad politico. Cu ki satisfaccion lo mi mira e dia yega cu e medio di prensa en cuestion eherse periodismo na forma responsabel. Periodismo no kiermeen lastra hende, periodismo responsabel ta exigi pa trese e hechonan padilanti sin balora nan.

Y finalmente mi tin un conseho pa e Minister di Ensenjansa sra. Michelle Hooijboer-Winklaar: bo ta un politico mescos cu mi, nos lugar pa debati ta den Parlamento. Cu bo ta usa 8 mil florin di placa di pueblo pa un compania di mercadeo pa atacami na forma baho y sushi, y pa purba scapa bo cara riba su mes caba ta algo cuestionable. Pero cu bo ta usa 8 mil florin pa luna pa caba cu integridad di hende drechi, humilde y inosente, manera e maestronan di Scol Kudawecha, ta un ABUSO. Y keremi Michelle Hooijboer-Winklaar, e ta hasi bo mas malo cu e ta hasi bo bon.

Expresionnan haci den e articulo aki no necesariamente ta refleha opinion di ArenaPoliti.co