Health Care Conference Aruba cu beneficionan sumamente positivo y importante 

ORANJESTAD – Riba prome, 2 y 3 di juni awor, Aruba ta sede di e prome Health Care Conference Aruba (HCCA) cu participacion di funccionarionan y ‘policy maker’ di Salubridad den e paisnan di Reino Hulandes. E conferencia aki tabata un sugerencia cu a bini for di IPKO (Inter Parlamentaire Koninkrijk Overleg 2014). HCCA ta tuma luga durante Siman di Salud na Aruba y despues di e conferencia ta tuma luga tambe e Expo Salud na Renaissance Convention Center.

Meta di e conferencia aki ta pa trece stakeholdernan hunto cu e meta pa discuti, bin cu sugerencia y resolucionnan cu mester contribui na control di e gastonan den Salubridad Publico na Aruba, pero tambe pa e otro islanan den Reino Hulandes. Pesey e participantenan pa e conferencia aki ta procedente di henter Reino Hulandes.

E conferencia aki, segun Minister di Salubridad Publico Alex Schwengle a splica durante un conferencia di prensa, ta sumamente importante pa Aruba. Por medio di e evento aki kier logra yega na un tipo di cooperacion, principalmente entre e stakeholdernan di e sector aki, ya cu e “cooperacion no ta un luho pero un necesidad”. Aruba, el a splica, tin un mercado chikito di algo mas cu 100 mil habitante, cu ta haci’e hopi caro pa por haci cierto proceduranan medico localmente. Pero si por cera un tipo di convenio cu un of mas di e islanan den Reino, lo brinda e servicio di un facilidad, p.e. un Thorax Center unda ta realisa “open heart surgery”, pa un mercado mas amplio. Brindando cierto tipo di servicio na un mercado di mas o menos 300 mil persona, lo por controla e gastonan di e sector aki miho, pero tambe cu tin mas placa cu ta wordo hinca den e economia local. E mandatario a duna e ehempel di servicionan cu Aruba awor ta cumpra den exterior, principalmente for di Colombia cu ta dunando un servicio di calidad. “Pero si bo por crea e facilidad ey na cas, e prijs kisas no ta super mas barata, pero importante ta cu e placa ta keda den e economia local.” E mandatario a bisa tambe cu mester studia con ta bay sobrevivi den e proximo añanan, wantando e gastonan. E ta premira cu si no bay colabora cu otro partnernan, e lo bira hopi dificil pa mantene e gastonan bou control. Tambe tin e ehempel di radiologia pa cual tin hopi pashent, y cu un poblacion di 100 mil persona Aruba lo por “afford” e gastonan di un aparato di Radio-terapie. Pero un mashin so no ta suficiente, ya cu semper mester tin un “back-up”. Den un caso asina, e ta kere cu mester dicidi si Aruba of Corsou ta bira e centro di Radio-Terapie, cu e compromiso cu tur isla lo haci uzo di e servicio eynan, cu lo trece e gastonan bou di control. Of Aruba y Corsou tin nan mesun centro di radio-terapie y ta bira un “backup” pa otro.

Minister Schwengle a bisa cu e ta hopi contento cu AZV e ultimo cinco añanan a logra un bon control den aumento di gastonan y maneho  di gastonan. E crecemento total no a surpasa ni 3% mas. “Si compara esaki cu cifranan internacional, e ta hopi bon, ya cu mayoria pais ta riba 8 of 9 porciento bay ariba. Pues cada aña e gastonan ta subi cu 8 of 10 porciento mientras cu na Aruba e ta subi cu ni 3%. Prome cu AZV, e crecemento tabata mas cu 7 porciento, cual ta mustra cu e control awor ta mas miho y lo por miho ainda cual lo bay wordo ilustra den plan cu ta bay entrega denter di poco na Parlamento.

Tambe den tratamento di wowo AZV ta gasta 5 miyon florin pa aña, di cual un gran parti ta bay pa tratamento na Corsou, esta e spuitmento di un remedi special den wowo pa personanan cu tin problema di retina, relaciona cu diabetis. Awor esaki ta wordo haci na Aruba mes. “E gastonan lo baha relativamente tiki, cu kisas mey miyon, pasobra e bentaha ta cu e placa aki ta keda den economia local. Esey caba ta un ganashi mientras cu e famianan ta keda na cas mes.” Y di otro banda, a bin ta pagando 20 miyon dollar na Colombia ultimo añanan pa pashentnan di curason y oncologia. Pues un gran parti di e placa aki tambe lo por keda den economia local. E tin su bentahanan economico y social.

Pa tur ariba menciona, e prome Health Care Conference Aruba ta masha importante pa tuma luga y yega na acuerdonan di cooperacion den compra di servicio.

Expresionnan haci den e articulo aki no necesariamente ta refleha opinion di ArenaPoliti.co