Evelyn Wever-Croes (MEP): Desde introduccion di health Tax 1 december 2014 placa di health tax no a yega AZV
Anja pasa 1 December 2014 Aruba a sera conoci cu e health tax (BAZV), un aumento di 1% di e BBO. E belasting aki lo mester a genera mas o menos 60 miyon florin pa anja cual mester wordo manda mesora pa AZV pa por percura pa e cuido medico di nos comunidad. Durante conferencia di prensa di MEP líder di MEP Evelyn Wever-Croes a trese padilanti cu loke nan a compronde ta cu te dia di awe gobierno no a paga AZV loke a genera desde december 2014. Cu otro palabra ta ranca placa di pueblo desde december pero te awe e placa aki no a yega den e caha di AZV, algo cu tin e fraccion geel hopi preocupa y cu ta contra ley.
“No lubida cu Fraccion di AVP durante tratamento di presupuesto a entrega un amienda pa aumenta e BAZV cu 1% mas entrante 1 juli 2015. Remarcabel ta cu e ley mes no a yega parlamento pa por wordo trata ainda. Pero hecho ta cu 1% mas lo bai pa AZV cual ta cuestionabel pasobra loke a wordo genera desde december 2014 mes nunca a yega su destino. Ley ta bisa cu e belasting aki ta un "bestemmingsheffing" y loke ta pasando awor ta contra di tur principio y ley. Nos ta spera cu e minister coregi e situacion aki y bini dilanti pa clarifica e asunto aki mas pronto cu ta posibel. Nos kier mira prueba cu e placa desde december 2014 a wordo manda pa AZV y no cu gobierno a gasta e placa aki na fiesta y biahamento”, segun lider di MEP Evelyn Wever-Croes.
Expresionnan haci den e articulo aki no necesariamente ta refleha opinion di ArenaPoliti.co