Durante fin di siman Caya Betico Croes tabata yena cu ambiente unda local y turista a disfruta di e variedad di producto cu e tiendanan tin pa ofrece. Esaki ta tuma lugar na cuminsamento di augustus, un periodo cu normalmente ta wordo considera como low season pa loke ta turismo.
Mientras cu oposicion, specialmente fraccion di MEP ta sigui bisa cu turismo ta bayendo malo, cu e calidad di nos turismo ta bayendo atras,cifranan y loke pueblo por wak tur rond ta indica algo totalmente diferente.
Den e prome 6 lunanan di 2015 por a mira un crecemento drastico di 16.2% den e cantidad di bishitantenan cu ta keda nos isla y por a mira cu nos mercado principal, esta Merca, a crece cu 7.8%, e porcentahe di crecemento di mas grandi den e area di Caribe.
Esaki pa loke ta trata cantidad di turista.
Si wak e calidad di turista cu ta bishita nos isla, por mira cu  Banco Central a publica recientemente cu e tourism receipts, esta e cantidad di placa cu turista ta laga atras a crece cu 6.62% den e prome 3 lunanan di 2015 compara cu e mesun periodo na 2014. Esaki ta significa 54 miyon Florin adicional den nos economia.  Esaki ta demostra claramente cu e calidad di turista cu nos isla ta conociendo ta mehorando y cu maneho estableci pa Minister Otmar Oduber y cu ta wordo carga pa tur partner den e industria ta mustrando di ta uno exitoso.
Mientras tanto por mira con den Caya Grandi no solamente localnan, pero turistanan ta cana cu mannan yen di saco y ta disfruta di e beyeza di nos centro di ciudad, incluyendo e tram. Inversionnan grandi cu a wordo realiza y ta den proceso ainda pa Gabinete Mike Eman pa asina haci nos centro di ciudad uno mas atractivo pa local y bishitante.
Minister Otmar Oduber ta indica cu semper tin caminda pa mehora, pero mester aprecia tambe loke ta tumando lugar y e desaroyo positivo cu nos isla ta conociendo cuminsando cu nos pilar economico principal, nos turismo.

Expresionnan haci den e articulo aki no necesariamente ta refleha opinion di ArenaPoliti.co