Un exitoso anochi di AMP expo

E Siman tras di lomba tabata un siman importante pa Cultura di Aruba unda varios proyecto a conoce nan inicio of culminacion. Un di e proyectonan encaminando ta e programa di Aruba Mural Projects. Recientemente a tuma luga un exposicion di tur e arte crea pa e hobennan cu ta bay participa den AMP.

Minister Oduber ta bisa: “Pa e proyecto di AMP nos por a scoge algun artista conoci pone diseñonan riba e muraya y crea arte a base di e parti di historia di nos isla, pero a dicidi di pone hobennan hunto den e proyecto pa siña mas di nos raisnan.” E mandatario di cultura ta sigui conta cu ta pesey a bay diferente scol unda entre 90 mucha a scoge 15 hoben pa forma parti di AMP. Nan a ricibi un curso den e temporada di vakantie aki. E mesun hobennan aki ta bay yuda e artistanan scogi pa crea e prome muralsnan na San Nicolas. Esaki lo forma parti di un atraccion total cu ta bay wordo crea den un districto di cultura. Sr. Oduber ta sigui bisa: “Intencion ta cu tin algun di nan cu lo keda cambia den transcurso di aña mientras otronan ta keda permanente.” A scoge artistanan local renombra cu mas experiencia pa por guia e hobennan crea diseñonan. E minister ta sigui amplia bisando cu e murayanan aki lo bay ta proteha y manteni cu su balor artistico unda nos bishitantenan por bishita y mira ki talento nos isla ta pose di dje. Sr. Oduber ta mira mas leu ainda: “E muralsnan aki lo keda promovi riba www.aruba.com como un di e atraccionnan adicional riba nos isla tambe.”

E artista nan scogi pa colabora cu e prome murayanan pa e proyecto di Aruba Mural Projects ta Armando Goedgedrag, Glenda Heyliger, Nigel Mathew y Rudyomar Leysner bou di guia artistico di Robert Tromp.

E siguiente paso awor ta unda e muchanan lo bay haci nan investigacion riba cultura di Aruba. Nan lo scoge un topico cu ta yama nan atencion pa nan presenta na e artistanan. E artistanan  na nan turno lo bay diseña kico ta nan vision pa e muraya. E prome paso unda lo cuminsa mira un cambio riba e murayanan lo tuma luga di october proximo. Esaki naturalmente pa duna e hobennan e espacio necesario pa haci nan investigacion apropiadamente. A tuma tempo pa prepara e hobennan cu ta e futuro artistanan, como e prome paso di AMP, pero preparacion di e murayanan ya caba ta na caminda unda e cambionan dentro di poco lo ta mas visibel.

E aceptacion di San Nicolas y henter comunidad tabata uno positivo. E concepto aunke ta uno conoci pa Aruba e ta un proyecto nobo. Hopi ta esunnan cu ta sigui e proyecto di cerca via facebook/arubamuralsprojects. Pero ta spera cu unabes e cambionan mas visibel tuma luga e entusiasmo lo sigui crece.

E seleccion aki ta pa e prome murayanan pero tin mas muraya cu lo mester bay forma parti di AMP unda cu mas artista lo keda acerca pa forma parti di esaki.

Expresionnan haci den e articulo aki no necesariamente ta refleha opinion di ArenaPoliti.co