Dialuna a inicia oficialmente cu parkeermeters na Aruba y for di oposicion, specialmente di partido MEP y su satelitenan por a scucha cu e gritonan a aumenta, mas cu e ultimo simannan. Nan a bisa cu parkeermeters ta un medida contra pueblo, cu e lo mata Caya Betico Croes y asina un cantidad di cosnan mas.

E desesperacion di e grupo aki a keda demostra dialuna mainta trempan ora riba medionan social a cuminsa publica potretnan di cayanan bashi, purbando di tira santo den wowo di pueblo. Esnan cu tabata yena e cayanan banda di e tiendanan tabata e trahadornan mes, kendenan awor a haya un otro locacion pa para nan auto, ofreciendo asina tur e espacio pa clientenan por para dilanti di e tiendanan. Asina por a mira cu na medida cu despues di 10or di mainta e parkeervakjes a wordo ocupa pa auto di clientenan y por a mira un cantidad di hende canando den caya.

Pero mester bisa cu e vision aki ta uno cu ta bin ya caba for di 2007, for di ex lider di partido MEP, Nel Oduber y partido MEP mes. Manera e carta adhunto ta ustra, den un decision di Conseho di Minister di e aña ey, nan a bisa cu parkeermeters lo tin diferente ventaha manera mas “turnover” den lugarnan di parkeo, paramento di auto mas organiza, reduccion di e demanda pa lugar di parkeo cu entre 10 pa 30%, reduccion di un gran parti di pegamento di trafico den centro di ciudad, mas bida pa centro di ciudad , mas seguridad dor di e parkeerwachters uniforma cu ta cana rond, mas posibilidad di trabou y mas entrada pa doñonan di tienda.

E tempo ey a pone como fecha di introduccion 15 di september 2007, pero esaki no a bay dor debi na problemanan interno di ken ta haya y ken no, pa lo cual MEP ta conoci pe.

Diferencia entre e vision di ex Prome Minister Nel Oduber y Minister Otmar Oduber ta cu e tempo aya nan kier a duna e parkeermeters na un compania priva, awe esey ta diferente unda parkeermeters ta cay bou Aruparking cu ta un compania di Arubus. Danki na entradanan cu lo ricibi for di e compania aki lo por percura pa sigui subsidia transporte escolar y deportivo y pa nos grandinan por sigui haya transporte publico gratis cu Arubus, ademas lo por mantene un tarifa reduci en bes di aumenta esaki na riba 5 Florin.

Mirando e datonan ariba menciona, Minister Oduber ta considera e criticanan constante y tiramento di santo den wowo di pueblo como un hilaridad, pasobra ta netamente nan lider honorario, ex Prome Minister y e propio MEP ta esnan cu a sostene y bisa cu parkeermeters ta bon pa tiendanan den caya y cu lo trece mayor seguridad. Pueblo por huzga pa su mes y wak con partido MEP ta purba manipula simplemente pa ansha pa poder.

Expresionnan haci den e articulo aki no necesariamente ta refleha opinion di ArenaPoliti.co