Minister di Transporte, Otmar Oduber a duna un comentario riba e diferente comentarionan cu ta wordo expresa relaciona cu introduccion di parkeermeters.
Un di e puntonan cu el a menciona ta riba e manifestacion cu tabatin algun siman pasa. El  a bisa cu te na e momentonan aki e no a haya e firmanan, pero cu esaki no ta importante, pasobra loke ta importante ta pa tuma den consideracion e diferente puntonan di atencion cu a ser treci dilanti dor di e diferente gruponan y Camara di Comercio.
Sr. Oduber a indica cu den e cuadro aki ta importante pa bolbe splica cu e parkeermeters no ta produci nada pa Gobierno, tur su entradanan ta bay pa su propio gastonan y e resto ta bay pa Arubus pa por mantene e subsidio cu tin, pasobra gastonan di Arubus ta sigui subi mientras cu e tarifanan no. Gobierno a scohe pa esaki y a bisa cu e unico adaptacion cu tin ta entrante 1 di januari otro aña cu e tarifa general lo subi na 3 Florin y esun di scolnan na 2 Florin.
Mas aleu Minister Oduber a bisa cu parkeermeters ta algo conoci mundialmente y por bisa cu Aruba ta lat cu su introduccion pa por regula y crea mas posibilidad pa centro di ciudad. “No tin duda cu por ta a sinti efecto di djele, pero tambe tin un cantidad di hende cu a sinti efectonan positivo di djele. Logicamente e positivonan no ta yama prensa of bise den comunidad, ta esunnan cu tin un experiencia negativo ta esnan cu ta trece dilanti den un voz mas halto”.
Pa loke ta posibel cambionan, Minister Oduber a bisa cu te awor parkeermeters tin un luna cu a wordo introduci y cu e ta un proceso cu lo por conoce adaptacionnan, manera aumento of reduccion di vaknan blanco of geel.

Expresionnan haci den e articulo aki no necesariamente ta refleha opinion di ArenaPoliti.co